इटहरी/ प्रतिक्षित नेपाली फिल्म ‘होस्टेल ३’को दोस्रो गीत ‘मनमा अनौठो’ सार्वजनिक भएको छ । किशोरकिशोरीको प्रेमभाव झल्काउने गीतमा फिल्मका मुख्य कलाकार पारस बम (कुलब्वाई) र सिम्रन पन्त फिचर्ड छन् । शुक्रबार बिहान रिलिज गरिएको गीतमा अर्जुन पोखरेलको शब्द तथा सङ्गीत छ भने रेश्मा पुन र उकेश रावलको सुमधुर आवाज सुन्न सकिन्छ ।
प्रवीण सिंहको कोरियोग्राफी रहेको गीतको भिडियो आकर्षक बनेको छ । सार्वजनिक भएसँगै यो गीतका क्लिपहरु टिकटक र रिल्समा ट्रेन्डिङ हुन थालेको छ भने युट्युबमा पनि सकारात्मक प्रतिक्रिया पाइरहेको छ । यसअघि सार्वजनिक ‘टिक टिक टिक’ गीत नेपाल युट्युब ट्रेन्डिङको १६ औँ स्थानमा उक्लिएको थियो । नेपालीहरूको बसोबास रहेका अन्य देशहरूमा पनि गीतले चर्चा पाइरहेको छ ।
क्याम्पस जीवनका संघर्ष, मित्रता, प्रेम र रमाइलो क्षण समेटिएको ‘होस्टेल ३’ लाई सशान कँडेलले निर्देशन गरेका छन् । फिल्मको स्क्रिप्ट माधव शर्माको रहेको छ भने कथा निर्देशक कँडेलकै हो । फिल्ममा पारस बम, सिम्रन पन्त, रिहान गिरि, आशिष घिमिरे, पदम तामाङ, हेना नगरकोटी, समा पराजुली लगायतका कलाकारको मुख्य भूमिका रहेको छ । साथै उमर खान, सन्तोष बानियाँ, रोहन श्रेष्ठ, आशिष् पुरुष लगायतका कलाकारहरू पनि फिल्ममा देखिनेछन् । हेर्नुस् भिडियो ।
सम्मान इन्टरटेनमेन्ट र आरोन कन फिल्म्सको सहकार्यमा निर्माण भएको फिल्मका निर्माताहरू सुरेश कँडेल, कर्ण कार्की र गोविन्द अधिकारी हुन् भने कार्यकारी निर्माता शङ्कर कोइराला रहेका छन् । सह निर्माताहरूमा शिशिर ज्ञवाली, कुन्दन गुप्ता र अनीश सिग्देल छन् ।
फिल्मका डिओपी अर्जुन तिवारी, सिनेमाटोग्राफर बुद्ध थापा र मनोज खत्री, मुख्य सहायक निर्देशक सुदिप कुँवर, प्रोडक्सन डिजाइनर यम प्रसाद ओली, सम्पादक विकास दाहाल, कोरियोग्राफर प्रवीण सिंह र रोशन विश्वकर्मा, द्वन्द्व निर्देशक हिमाल केसी, पोस्टर डिजाइनर राकेश दाहाल रहेका छन् । नेपालमा फागुन २३ गते प्रदर्शन हुने ‘होस्टेल ३’ सोही मितिमा नेपाल बाहिरका विभिन्न देशहरूमा पनि रिलिज गर्ने तयारीमा छ भने नेपाल वितरक आरआर फिल्म्स र काफिया फिल्म्स रहेका छन् ।
Discussion about this post