गायिका एलिना चौहानले गरिन् पति विष्णुसँग सम्बन्धविच्छेदको मुद्धा दायर

इटहरी/ गायिका एलिना चौहानले काठमाडौँ जिल्ला अदालतमा आफ्नो वैवाहिक सम्बन्धविच्छेदको मुद्दा दायर गरेकी छन् । उनले वारेस विष्णुप्रसाद खरेल मार्फत मुद्दा दर्ता गराएकी हुन्। एलिनाले गत वैशाखमा बागलुङ निवासी विष्णु सापकोटासँग विवाह गरेकी थिइन् । पछिल्लो समय उनीहरुको दाम्पत्य जीवनमा समस्या देखिएको चर्चा चल्दै आएको थियो ।

दायर गरिएको मुद्दामा उनले २०७९ साल पौष ४ गतेदेखि विष्णु सापकोटासँग प्रेम सम्बन्ध रहेको खुलाएकी छन् । साथै, विवाहपछि आफू गर्भवती नभएको समेत उल्लेख गरेकी छन् । विवाहको एक महिनापछि अष्ट्रेलिया गएका यी जोडीको सुरुवाती वैवाहिक जीवन राम्रो भए पनि पछि सम्बन्धमा दरार आउन थालेको थियो । केही समय अघि अर्की गायिका ज्योति मगरले एक स्ट्याटस लेखेपछि एलिना र विष्णुको नराम्रो संग सम्बन्ध बिग्रिएको खुलेको थियो ।

विवाहअघि पनि प्रेममा रहदा यी दुईको प्रेम टुंगिएको चर्चा चलेको थियो, विशेषगरी एलिनाको स्वरमा रहेको ‘तिमीले धोका दियौ भने माकसम कट्टा हान्दिन्छु’ बोलको गीत सार्वजनिक हुँदा यो चर्चा व्यापक चलेको थियो । त्यसबेला धेरैले उनीहरूको प्रेममा पूर्णविराम लागेको अड्कल गरेका थिए । तर त्यसको केही समयपछि उनीहरू विवाह बन्धनमा बाँधिए । एलिना कार्यक्रमका सिलसिलामा बाहिर जाँदा श्रीमान विष्णुले शंका गर्ने, बारम्बार फोन गरेर तुरुन्त घर आउन दबाब दिने जस्ता कुराले सम्बन्धमा समस्या आएको एलिनाले उजुरीमा उल्लेख गरेकी छन् ।

अष्ट्रेलियामा बसाइको तीन महिनापछि यस्ता विषयले नै आफू नेपाल फर्किन बाध्य भएको उनले खुलाएकी छन् । नेपाल फर्किएपछि पनि श्रीमानले आफ्नो चरित्रमाथि शंका उपशंका गर्ने, सामाजिक सञ्जालमा लाइभ आएर मानसिक तनाव दिने गरेको आरोप लगाएकी छन् । एलिनाले श्रीमानबाट कुनै अंश तथा मानाचामलाको दाबी नगर्ने गरी अदालतमा सम्बन्धविच्छेदको मुद्दा दायर गरेकी छन् । अब कानुनी प्रक्रिया कसरी अघि बढ्छ भन्ने हेर्न बाँकी छ ।