अदालती मुद्धा फिर्ता भएसंगै आजबाट प्रदर्शनमा आयो फिल्म ‘एक्टर: टेक वन’

इटहरी/ नेपाली फिल्म उद्योगमा लामो समयदेखि प्रतीक्षित ‘एक्टर: टेक वन’ अन्ततः देशभरका फिल्म हलहरूमा प्रदर्शनमा आएको छ । यस फिल्मको रिलिज अघि नाम सम्बन्धी विवादले गर्दा अस्थायी रूपमा बाधा परे पनि अदालती प्रक्रिया पूरा भएसँगै यो फिल्म दर्शकहरूको लागि आज शुक्रवारबाट प्रदर्शनमा आएको हो ।

‘एक्टर’ र ‘एक्टर: टेक वन’ बीचको नाम विवादले फिल्मको प्रदर्शनमा २ दिन ढिलाई गराएको थियो । तर, बिहीबार दुवै पक्षबीच सहमति भएपछि ‘एक्टर: टेक वन’ निर्माता थमन कुमार भण्डारीले पत्रकार सम्मेलन गरी शुक्रवारदेखि फिल्म रिलिज हुने घोषणा गरेका थिए । गत सोमबार भएको ग्रान्ड प्रिमियर शोमा फिल्मले दर्शकहरूबाट उत्कृष्ट प्रतिक्रिया पाएको थियो । दर्शकहरूले फिल्मको कथा, निर्देशन र कलाकारहरूको अभिनयलाई खुलेर प्रशंसा गरेका थिए ।

‘एक्टर: टेक वन’मा प्रदिप खड्का, आना शर्मा, दिव्या रायमाझी, राजबल्लभ कोइराला, दिव्य देव, सृजना अधिकारी, उषा रजक, सुशील सिटौलालगायतका कलाकारहरूले प्रमुख भूमिका निर्वाह गरेका छन् । फिल्मको स्क्रिप्ट आकाश बराल र राजन भुसालले लेखेका हुन् भने यो अधृत फिल्म्स् र अ मोती फिल्मको संयुक्त प्रस्तुति हो । निर्माता थमन कुमार भण्डारी, क्रियटिभ प्रोड्युसर मोती कार्की र सह-निर्माता अनीश भुसालले यो फिल्मलाई सफल बनाउन महत्त्वपूर्ण भूमिका खेलेका छन् ।