इटहरी/ नेपाली फिल्म उद्योगमा चर्चित हास्य टेलिश्रृंखला ‘सक्किगोनि’को टिमले निर्माण गरेको नयाँ फिल्म ‘लाज शरणम्’को टिजर सार्वजनिक भएको छ । यो फिल्म वर्षकै प्रतिक्षित फिल्महरू मध्ये एक मानिएको छ भने आगामी महिनाको फागुन १४ गते महाशिवरात्रिको अवसरमा प्रदर्शन हुने तयारी छ । टिजरले फिल्मको कथा, कलाकार र दृश्यावलीको झलक दिन्छ । यसमा विदेश गएका छोराको कथा र उनको फर्किने प्रक्रियामा आएका चुनौतीहरू देखाइएको छ ।
बुवाले छोराको सुरक्षाको कामना गर्दै गरेको दृश्यबाट टिजर सुरु हुन्छ । विदेश गएको छोरो कफिनमा फर्किएपछि उत्पन्न तनाव, पारिवारिक द्वन्द्व र नदीमा डुबेको व्यक्तिको उद्धार जस्ता रहस्यमय घटनाहरूको संकेत गरिएको छ । फिल्मले गरिबी, बेरोजगारी र नेपाली नागरिकको दुःखलाई उजागर गर्ने देखिन्छ । हेर्नुस् टिजर ।
यो फिल्ममा सिताराम कट्टेल (धुर्मुस), मुकुन्द श्रेष्ठ, महेश त्रिपाठी, विजय बराल, अपर्ण थापा, रेणू योगी, विजय लामा, माला लिम्बू लगायतका कलाकारहरूले अभिनय गरेका छन् । साथै, ‘सक्किगोनि’ टिमका अर्जुन घिमिरे (पाँडे), सागर लम्साल (बले), हरिष निरौला (क्रकोज), प्रियाना आचार्य (मुन्नी), कमलमणि नेपाल (खुपीका बाउ) लगायतका परिचित अनुहारहरू पनि देखिन्छन् ।
फिल्मको निर्देशन कुमार कट्टेल ‘जिग्री ब्रो’ले गरेका हुन् भने छायांकन सुदीप बरालले गरेका छन् । यो फिल्म जेपिटी क्रियसनको ब्यानरमा निर्माण भएको हो भने नवीन श्रेष्ठ, राम नरेश शाह र सृजना खड्का सह-निर्माताको रूपमा रहेका छन् । टिजरमा देखिएको क्यामेरा वर्क, सुन्दर लोकेसन र लङ सटले दर्शकलाई आकर्षित गर्ने देखिन्छ । ‘लाज शरणम्’ले नेपाली समाजका यथार्थपूर्ण विषयहरूलाई उजागर गर्दै हास्य र मर्मस्पर्शी कथाको मिश्रण प्रस्तुत गर्ने देखिन्छ । यसले दर्शकहरूबाट ठूलो अपेक्षा जगाएको छ ।
Discussion about this post