‘परी त्यो डाँडामा’ गीत सम्झाउने फिल्म ‘फेरि रेशम फिलिली’ को ‘फेरी जालमा’ सार्वजनीक

इटहरी/ प्रचारप्रसारलाई तिब्रता दिँदै गइरहेको फिल्म ‘फेरि रेशम फिलिली’ले एकपछि अर्को प्रचार सामग्री सार्वजनीक गर्दै दर्शकहरूको ध्यान केन्द्रित गरिरहेको छ । यसैक्रममा यो फिल्मको दोस्रो गीत ‘फेरी जालमा’ बिहीबार काठमाण्डौमा आयोजित एक विशेष कार्यक्रमका बीच सार्वजनीक गरिएको छ । यो गीतले फिल्मको प्रचारप्रसारलाई अझ बलियो बनाएको छ ।

गीत ‘फेरी जालमा’ करिब १० वर्ष अघि २०७१ सालमा रिलिज भएको मूल गीत ‘जालमा’को रि-मेक संस्करण हो । त्यतिबेला यो गीतले सामाजिक सञ्जाल, मीडिया तथा इन्टरनेटका विविध माध्यममा भाइरल हुँदै फिल्म ‘रेशम फिलिली’लाई बक्सअफिसमा ठूलो सफलता दिलाएको थियो । तर, फिल्म प्रदर्शनको दोस्रो दिन नै भुइचालो आएपछि यसको प्रदर्शन रोकिएको थियो । यद्यपि, प्राकृतिक विपत्तिका बाबजुद पनि फिल्मले राम्रो व्यापार गरेको थियो । हेर्नुस् भिडियो ।

अब आगामी फागुन १४ गतेदेखि सार्वजनीक प्रदर्शनमा आउने यसको सिक्वेल ‘फेरि रेशम फिलिली’ले पनि दर्शकहरूलाई मनोरञ्जन दिने अपेक्षा गरिएको छ । सार्वजनीक गीत ‘फेरी जालमा’ कालीप्रसाद बाँस्कोटा र सोमिया बराइलीले गाएका छन् भने मानस राजले गीत कम्पोज गरेका हुन् । गीतको भिडियोमा प्रदिप लामाको कोरियोग्राफी र शिवराम श्रेष्ठको छायांकन रहेको छ । युट्युबमा सार्वजनिक भएको यस गीतमा फिल्मका मुख्य कलाकार विनय श्रेष्ठ र सुपुष्पा भट्ट फिचर्ड छन् ।

फिल्म ‘फेरि रेशम फिलिली’लाई निरज महर्जनले निर्देशन गरेका छन् । उनले नै फिल्मको कथा लेखेका हुन् । यस फिल्ममा विनय श्रेष्ठ, सुपुष्पा भट्ट, कामेश्वर, नीर शाह, प्रकाश घिमिरे, शिशिर वाङ्गदेल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, सजन थापा लगायतको अभिनय छ । ‘रेशम फिलिली’का निर्देशक प्रनव जोशी र अभिनेत्री मेनुका प्रधान बाहेकको अधिकांश टिम यसमा पनि रहेको छ ।

फिल्मको छायांकन सुसन प्रजापतीले गरेका छन् भने पटकथा निर्देशक महर्जन र आकाश बरालको सहयोगमा तयार भएको छ । द्वन्द्व निर्देशन नरेश किङ्ग योगीले गरेका छन् । यो फिल्म सिनेमा आर्ट र वि मोसन पिक्चर्सको सहकार्यमा निर्माण भएको हो । यस फिल्मको निर्माता रौनक विक्रम कडेल र कार्यकारी निर्माता सुरज बम ठकुरी हुन् भने सह-निर्मातामा एनि थापा रहेकी छिन् । फिल्मको पोस्टर डिजाइन ट्राइडेन्ट कन्सेप्टका रोयल भिमसेनले गरेका छन् । यो फिल्म गोविन्द शाहीको काफिया फिल्मस् र कुवेर सिने डिष्ट्रीव्युसनले वितरण गर्दैछ ।