इटहरी/ मिर्गौला फेल भएका धरानका डान्सर हेमराज गजमेरको उपचार सहयोगार्थ फिल्म ‘सारंग’को विशेष च्यारिटी शो आयोजना गरिने भएको छ । निर्देशक प्रशान्त तामाङका अनुसार, धरानस्थित फ्रेण्डस सिनेमाजमा माघ १७ गते शो गरिंदैछ । धरानमा रहेको फ्रेन्ड्स सिनेमाजमा बेलुकी ४:३० बजेदेखि यो विशेष च्यारिटी शो गरिने भएको हो । शोमा फिल्मका प्रमुख अभिनेत्री ऋचा शर्माको पनि उपस्थिती रहने बताईएको छ ।
ऋचा शर्माको शीर्ष अभिनय रहेको फिल्मले पारिवारिक विवादले बालबालिकामा पार्ने मनोवैज्ञानिक प्रभावलाई उजागर गर्ने प्रयास गरेको छ । फिल्ममा ऋचासँगै उत्पल झा, सुरज तमु, समीरमणि दीक्षित, मणि राई, अनिशा न्यौपाने, निरज ब्ल्याक, विश्व स्याङ्बो, दीपिका थापा, सुमन सागर जंग केसी, प्रभात श्रेष्ठ तथा बालकलाकार सम्राट थापा र आदित्य कार्कीको अभिनय रहेको छ ।
यही माघ २५ गतेदेखि प्रदर्शनमा आउने फिल्म प्रेम तामाङ र फूलमाया तामाङले निर्माण गरेका हुन् । यो फिल्मको सह-निर्मातामा पुष्पा लिम्बू र बिनु गुरुङ छन् । फिल्ममा शंकर थापा ‘स्माइल’ र नकुल कार्कीको संगीत, सुष्मा राईको कोरियोग्राफी, गोपाल रायको छायांकन र मित्र डि गुरुङको सम्पादन रहेको छ ।
Discussion about this post