इटहरी/ फिल्म ‘दुःखी आत्मा’को पहिलो गीत ‘जुनी जुनी भरीलाई’ सार्वजनिक भएको छ, यो गीत सार्वजनिक सँगै फागुन २ मा रिलिज हुन लागेको यो फिल्मको प्रचारप्रसारमा अझै मद्धत पुगेको छ । केतन क्षेत्री र मुना ठटालको सुमधुर स्वर, इश्वर कार्कीको शब्द-संगीत र उदयराज पौडेलको एरेन्जमा तयार यो गीत रोमान्टिक शैलीमा प्रस्तुत गरिएको छ । भक्तपुर दरबार स्क्वायरमा छायांकन गरिएको गीतमा दयाहाङ राई र आँचल शर्मा लाई फिचर्ड गरिएको देख्न सकिन्छ ।
रामजी लामिछानेको कोरियोग्राफी, आलोक शुक्लाको छायांकन र रामप्रसाद चौधरीको सम्पादनले गीतको दृश्यलाई आकर्षक बनाएको छ । फिल्मको टिजर र ब्रेकअप कविता सामाजिक सञ्जालमा हिट भइसकेको छ । विशेषगरी, ब्रेकअप कवितामा टिकटक प्रयोगकर्ताले बनाएका लाखौं भिडियोले फिल्मलाई थप प्रचारमा ल्याएको छ । ‘जुनार’ले हिट भएको टिजरकै झल्को गीतमा पनि देखिन्छ, जसले दर्शकलाई उत्साहित बनाएको छ । हेर्नुस् सार्वजनिक गीत तथा भिडियो ।
दीपेन्द्र लामा को लेखन तथा निर्देशनमा बनेको यो फिल्ममा हिमाल कडरियाको लगानी रहेको छ भने सुदिप ढकाल कार्यकारी निर्माता हुन् । फिल्ममा दयाहाङ र आँचलका साथै अनुप विक्रम शाही, बुद्धि तामाङ, रेयर राई, पुष्कर गुरुङ, कविता आले, आरती आचार्य, लोकेन्द्र लेखक, आशान्त शर्मा, दिया मास्के, र लुनिभा तुलाधरको अभिनय छ । क्लक वर्क क्रियशन को ब्यानरमा निर्माण भएको यो फिल्मले यौन समस्यामा पर्ने एक पुरुषको कथा रमाइलो ढंगले प्रस्तुत गर्नेछ । गम्भीर विषयलाई मनोरञ्जनात्मक शैलीमा प्रस्तुत गर्न खोजिएको यो फिल्मले दर्शकको मन जित्ने अपेक्षा गरिएको छ ।
Discussion about this post