आगामी फिल्ममा अवसर दिने उद्देश्यसहित फिल्म ‘एक्टर: टेक वान’ले नयाँ कलाकार खोज्दै

इटहरी/ नेपाली फिल्म ‘एक्टर: टेक वन’ले नयाँ कलाकारलाई मौका दिने उद्देश्यले ‘एक्टिङ कन्टेस्ट’को सुरुवात गरेको छ । माघ १६ गते रिलिज हुने यो फिल्मसँगै यो प्रतियोगिताले प्रतिभाशाली कलाकारहरूलाई ठूलो पर्दामा देखिने अवसर प्रदान गर्नेछ । प्रतियोगिताको विजेताले निर्माण कम्पनी ‘अधृत फिल्म्स् प्रा.लि.’ले आगामी प्रोजेक्टमा अभिनयको अवसर प्रदान गर्ने घोषणा गरेको छ ।

यो कन्टेस्टमा सहभागिता जनाउन विश्वभरका नेपालीहरूले फिल्मको टिजर, ट्रेलर वा गीतको १ मिनेट लामो भिडियो आफ्नो सामाजिक सञ्जालमा पोस्ट गर्नुपर्नेछ । पोस्ट गर्दा फेसबुक, इन्स्टाग्राम र टिकटकमा फिल्मका आधिकारिक ह्यान्डलहरूलाई ट्याग/मेन्सन गरी ह्यासट्याग #AKTORMAGH16 प्रयोग गर्नुपर्नेछ ।

सहभागीहरूको भिडियोलाई फिल्मको आन्तरिक निर्णायक टिमले मूल्याङ्कन गर्नेछ । प्रतियोगिताको अन्त्यमा विजेताको घोषणा फिल्मका मुख्य अभिनेता प्रदिप खड्काले गर्नेछन् । यो प्रतियोगितामा सहभागी हुन माघ ३० गतेसम्म खुला रहनेछ ।हालै सार्वजनिक ट्रेलरले पच्चीस लाखभन्दा बढी दर्शकको ध्यान तानेर युट्युब ट्रेन्डिङको शीर्ष स्थानमा रहन सफल भएको छ ।

फिल्म युनिटले यस प्रतियोगितामार्फत अभिनयमा रुचि राख्नेहरूलाई ठूलो अवसर प्रदान गर्ने लक्ष्य लिएको जनाएको छ । ‘एक्टर: टेक वन’ राजन भुसालको निर्देशनमा बनेको हो । प्रदिप खड्का, आना शर्मा, दिव्या रायमाझी, राजबल्लभ कोइराला, दिव्य देवलगायतका कलाकारको अभिनय रहेको यस फिल्मको स्क्रिप्ट आकाश बराल र राजन भुसालले लेखेका हुन् । यो फिल्म अधृत फिल्म्स् र मोती फिल्मको संयुक्त प्रस्तुति हो ।