इटहरी/ ‘पूर्ण बहादुरको सारङ्गी’ जस्तो ऐतिहासिक ब्लकबस्टर फिल्म निर्देशन गरेका निर्देशक सरोज पौडेलले आफ्नो नयाँ फिल्म ‘कोशेढुंगा’ निर्माणको घोषणा पश्चात कलाकारहरूको लाईनअप पूरा गरेका छन् । सोसल ड्रामामा आधारित यो फिल्मले अभाव, सपना र संघर्षको कथा बोकेको बताइएको छ । निर्देशक पौडेलका अनुसार सुरक्षा पन्त, आर्यन सिक्देल, नीति शाह र प्रवीण खतिवडा जस्ता लोकप्रिय कलाकारहरूले फिल्मको मुख्य भूमिका निर्वाह गर्नेछन् ।
थिम पोस्टरले नै फिल्ममा महिला पात्रले नेतृत्व गर्ने संकेत गरेको भए पनि निर्देशकले अझै मुख्य पात्रबारे थप खुलासा गरेका छैनन् । सरोज पौडेलको अघिल्लो फिल्म ‘पूर्ण बहादुरको सारङ्गी’ले नेपालभित्र करिब ५० करोड ग्रस कलेक्सन गर्दै ऐतिहासिक सफलता हात पारेको थियो । यसै कारण, ‘कोशेढुंगा’ पनि अत्यधिक प्रतिक्षित बनेको छ ।
पौडेलले दर्शकहरूको माया जित्ने अर्को उत्कृष्ट फिल्म बनाउने वाचा गरेका छन् । नरदेवी फिल्म्सको प्रस्तुतिमा निर्माण हुने यो फिल्ममा प्रेविल कँडेल र हरि महतले लगानी गर्नेछन् भने दिनेश खड्का कार्यकारी निर्माताको भूमिकामा रहेका छन् । फिल्मको छायांकन बाबु श्रेष्ठले गर्नेछन् भने सम्पादन सुरेन्द्र पौडेलले सम्हाल्नेछन् ।
संगीतमा रिदम कँडेल र आषिश अविरल छन्, भने कास्टिङ निर्देशक सुवलमणि सापकोटा हुन् । यो फिल्मको छायांकन अगावै अन्तर्राष्ट्रिय प्रदर्शन अधिकार पनि बिक्री गरिसकेको छ । सेभेन सिज इन्टरनेसनल कम्पनीले यसको वितरण अधिकार खरिद गरेको जानकारी प्राप्त भएको छ । फिल्मको छायांकन आगामी फागुन २ गतेदेखि सुरु हुनेछ भने यसको प्रदर्शन सन् २०८२ मा हुने निर्माण पक्षले जनाएको छ । निर्देशक पौडेलको यो नयाँ यात्रा पनि ‘पूर्ण बहादुरको सारङ्गी’को जस्तै सफल हुने अपेक्षा गरिएको छ ।
Discussion about this post