इटहरी/ नाजिर हुसेन, सृष्टि श्रेष्ठ र संजय गुप्ताको मुख्य भूमिका रहेको फिल्म ‘केटी हराएको सूचना’ यही शुक्रबारदेखि देशभर प्रदर्शनमा आउँदैछ। दर्शकको प्रतीक्षालाई ध्यानमा राख्दै देशकै ठुलो मल्टिप्लेक्स चेन क्यूएफएक्सले अग्रिम बुकिङ खुला गरिसकेको छ । क्यूएफएक्सका सञ्चालक नकिम उद्दिनको निर्माणमा बनेको यो फिल्मले पहिलो दिनमै राम्रो व्यापार गर्ने अपेक्षा गरिएको छ ।
यो फिल्मलाई कोशी प्रदेश इटहरी, विराटनगर र विर्तामोडमा रहेको क्यूएफएक्स चेनको ३ ओटा हलले ११ शो दिएको छ । इटहरीको क्यूएफएक्स सिनेफ्लेक्सले ४ शो, विराटनगरको भाटभटेनीमा रहेको क्यूएफएक्स ३ शो र विर्तामोडमा रहेको क्यूएफएक्सले ४ शो दिएको छ । क्यूएफएक्स बाहेक कोशी प्रदेशको विर्तामोडमा रहेको पाथिभरा सिनेप्लाजाले मात्र हाललाई अग्रिम टिकट बुकिङ खुलाएको छ । यो हलले केटि हराएको सूचना लाई ३ शो दिएको छ ।
यस्तै यो फिल्मलाई क्यूएफएक्सले काठमाडौं उपत्यकामा २५ र कोशी प्रदेश सहित काठमाडाैँ बाहिर ३५ शो छुट्याउँदै कुल ६० शो प्रदर्शनका लागि तयारी गरेको छ । दीपेन्द्र गौचनको निर्देशन तथा कथा लेखनमा तयार भएको यस फिल्ममा अमर महर्जनले छायांकन, निमेष श्रेष्ठले सम्पादन र शंकर महर्जनले एक्सन निर्देशन गरेका छन् ।
संगीतमा दीपेन्द्र गौचन, प्रवेश मल्लिक र करूण थापाको सिर्जना रहेको छ भने रामजी लामिछाने र राजीव कर्णको कोरियोग्राफी रहेको छ । फिल्ममा नाजिर, सृष्टि र संजयसँगै रामनारायण ठाकुर, रीना रिमालजस्ता कलाकारको अभिनय रहेको छ । मल्टिप्लेक्स बाहेक अन्य हलहरूमा पनि चाँडै बुकिङ खुल्ने अपेक्षा गरिएको यो फिल्मले दर्शकको मन जित्ने अनुमान गरिएको छ ।
Discussion about this post