इटहरी/ निर्माणको तयारीमा रहेको फिल्म ‘माईतीघर’ का लागि अभिनेता धीरज मगरलाई अनुबन्ध गरेसँगै यो फिल्ममा कलाकारहरूको लाईनअप पूरा भएको छ । फिल्मका निर्माता रोहित अधिकारीले अभिनेता मगरसँग सोमबार कागजी सम्झौता भएको जानकारी गराए । यो फिल्ममा यसअघि केदार घिमिरे ‘माग्नेबुढा’, प्रकाश सपुत, उपासना सिंह ठकुरी, दिकिला शेर्पा र बुद्धि तामाङ अनुबन्ध भइसकेका छन्।
यो फिल्म ‘माइतीघर’लाई आगामी २०८२को दशैँको अवसर पारेर फूलपातीका दिनदेखि सार्वजनिक प्रदर्शन गरिने निर्माता अधिकारी बताउँछन् । उनले केहीदिन अघि सामाजिक सञ्जाल फेसबुकमा एक स्ट्याटस पोस्ट गर्दै “एउटा हल, एउटा मात्रै शोज पाएपनि हामि फुलपाति मै लगाउने छौ २०८२ भेटौ” भन्दै सार्वजनिक उद्घोष गरेका थिए । अब उनको बोली कतिको अडिग रहन्छ त्यो हेर्न त बाकी नै छ । मिलन तामाङको निर्देशनमा निर्माण भइरहेको यो फिल्ममा रविन शेरचन र धिरज तामाङले समेत लगानी गरेका छन् ।
चन्द्रकुमार दोङको लेखन, सुशन प्रजापतिको छायाङ्कन र रामशरण पाठकको संवादले फिल्मलाई अझ बलियो बनाउने अपेक्षा गरिएको छ । यो फिल्मको कार्यकारी निर्माता ईश्वरी श्रेष्ठ हुन् । रोहित अधिकारी फिल्मस् को चौथो प्रस्तुतिको रुपमा निर्माण हुने यो फिल्मको शीर्ष गीतमा चर्चित बलिउड पाश्र्वगायिका संजीवनीले स्वर दिने भएको कुरा यसअघि नै सार्वजनिक भइसकेको छ । यसअघि सोही नामबाट निर्माण भएको फिल्मको कालजयी गीत ‘वसन्त नै बस्न खोज्छ यहाँ…’को नयाँ संस्करणमा उनलाई सुन्न पाइने भएको हो ।
Discussion about this post