इटहरी/ सागर लम्साल ‘बले’ शीर्ष भूमिकामा रहनेगरि नयाँ फिल्म ‘डल्लेले इन्ट्री मार्याे’ मा अनुबन्धित भएका छन् । हाँस्य अभिनेता तथा मोडलका रूपमा चर्चित सागरले यस फिल्मका लागि ३५ लाख रुपैयाँ पारिश्रमिक लिएका छन्, जुन उनको करियरकै उच्च हो । राजु गिरीको निर्देशनमा निर्माण हुने यो फिल्ममा उनी डल्ले नामक युवकको चरित्रमा प्रस्तुत हुनेछन् ।पछिल्लो समय दर्शकको मन जित्न सफल अभिनेता सागर विशेषगरी ‘सक्किगो नि’ सिरिजबाट चर्चामा आएका हुन् ।
ठूलो पर्दामा ‘लोफर’ फिल्मबाट डेब्यु गरेका सागरले त्यसपछि ‘हैरान’ लगायतका फिल्महरू र सयौं चर्चित म्युजिक भिडियोमा अभिनय गर्दै आफ्नो क्रेज थप बढाएका छन् । सागरको अभिनय रहेको अर्को फिल्म ‘लाज शरणम’ फागुन १४ गतेदेखि विश्वव्यापी रूपमा प्रदर्शनमा आउँदैछ । निर्देशक गिरीका अनुसार सागरलाई फिल्ममा लिने निर्णय उनको अभिनय कुशलता, क्यारेक्टरमा फिटनेस र दर्शकबीचको लोकप्रियताका कारण गरिएको हो ।
गिरी भन्छन्, “स्क्रिप्टको माग र सागरको क्रेजलाई हेर्दा उनलाई दिइएको पारिश्रमिक अझ बढी हुनुपर्ने देखिन्छ ।” लक्ष्मण सुवेदीद्वारा लेखिएको यो सोसियल कमेडी जनराको फिल्म फागुन अन्त्यदेखि छायांकन सुरु गरिनेछ । उषा फिल्मसको ब्यानरमा निर्माण हुने फिल्मका निर्माता सावित्रा चिलुवाल, निर्मता बस्नेत, आशिष, र आदर्श बस्नेत रहेका छन् । अन्य कलाकार र प्राविधिकको टुंगो केही हप्ताभित्र लगाइने योजना छ ।
Discussion about this post