अशोक दर्जी हिरो बन्ने फिल्ममा निता ढुंगानाको इन्ट्री, को-को छन् अन्य कलाकार ?

इटहरी/ लोकप्रिय बाल गायक अशोक दर्जीले फिल्म ‘मन बिनाको धन ठूलो कि धन बिनाको मन’ मार्फत फिल्मी अभिनयमा डेब्यू गर्न लागेका छन् । चर्चित संगीतकार टंक बुढाथोकीले निर्देशन गर्ने यस फिल्ममा अशोक मुख्य भूमिकामा रहनेछन् । अशोकसँगै यो फिल्मका लागी अभिनेत्री नीता ढुंगाना पनि अनुबन्ध भएकी छन् । ढुंगानाको निर्माण तथा अभिनयमा यसअघि ह्रस्व दीर्घ फिल्म प्रदर्शनमा आएको थियो । त्यसपश्चात् उनले यो फिल्ममा अभिनय गर्ने भएकी हुन् ।

फिल्म ‘मन बिनाको धन ठूलो कि धन बिनाको मन’ मा सरोज खनाल, रमेश विश्वकर्मा, बुद्धि तामाङ, रवीन्द्र झा, एआर बुढाथोकी, शंकर श्रेष्ठ र साम्राज्ञी थापालगायतका कलाकारहरुको समेत अभिनय रहने पक्का भएको छ । फिल्मको कथाले मागेका अन्य कलाकारहरु छिट्टै फाइनल गरिने निर्देशक बुढाथोकीले जानकारी गराए । निर्माता तथा निर्देशक टंक बुढाथोकीले कथा लेखेको यो फिल्मको पटकथा र संवाद शिवम अधिकारीले तयार पारेका हुन् ।

छिट्टै छायांकन सुरु गर्न तयारी भैरहेको फिल्मलाई सौरभ लामाले खिच्नेछन् भने वितरणको जिम्मा बैंकटेश इन्टरटेन्टमेन्टले लिएको छ । टंक बुढाथोकीकै संगीत रहेको गीत ‘मन बिनाको धन ठूलो कि धन बिनाको मन’ बाट अशोक दर्जीको जीवन बदलिएको थियो । हालसम्म टंककै हेरचाहमा अहिले कक्षा ८ मा अध्ययनरत अशोकलाई बुढाथोकीले काठमाडौं ल्याएर अध्ययन र जीवन व्यवस्थापनमा समेत सघाएका छन् । दर्जनौं फिल्ममा संगीत भरिसकेका बुढाथोकीले यस फिल्ममा पनि संगीत दिनेछन् ।