माघ २५ मा ‘ममी’, प्रियंका कार्की र दीया मास्के फिचर्ड ‘म त यसै नक्कली’ सार्वजनिक

इटहरी/ अभिनेत्री प्रियंका कार्की, दीया मास्के र अभिनेता सुलक्षण भारतीको मुख्य भूमिका रहेको तथा समर निरौलाको डेव्यु निर्देशनमा बनेको फिल्म ‘ममी’को पहिलो गीत सार्वजनिक गरिएको छ । ‘म त यसै नक्कली’ बोलको गीतमा समीक्षा अधिकारी र विज्ञानी पराजुलीको स्वर रहेको छ भने एसडी योगीले संगीत भरेका छन् । हर्क साउदको शब्द रचना र रिकेश गुरुङको एरेञ्ज रहेको यो गीतको भिडियोलाई विक्रिम स्वाँरले कोरियोग्राफी गरेका हुन् ।

हरर फ्यामिली ड्रामामा आधारित ‘ममी’ले प्रिय कुकुरको निधनपछि कालो बिरालो घरमा ल्याउनाले सुरु हुने परिवारको अनौठो र भयानक घटना श्रृंखला प्रस्तुत गर्छ । कुकुरको मृत्युपछि कालो विपत्तिले घेरिएको परिवारको कथा सस्पेन्सपूर्ण ढंगले चित्रण गरिएको छ । हेर्नुस् भिडियो ।

आउँदो माघ २५ गतेदेखि प्रदर्शनमा आउने यस फिल्ममा समीप निरौला, घनश्याम जोशी, आयुषी ढकाल, जेभिस श्रेष्ठ र गीत विष्टको पनि अभिनय रहेको छ । सो ट्वान्टी फाइभको प्रस्तुति रहेको ‘ममी’मा समर निरौला र पूर्णिमा जोशीको लेखन रहेको छ ।

यस्तै यो फिल्मको निर्माता लोक राज जोशी र पूर्णिमा जोशी हुन् भने कार्यकारी निर्माताको रूपमा सुमन कोइराला रहेका छन्। फिल्मको छायांकन निशाल पौडेल र शरद महतोले गरेका हुन् । यस्तै सम्पादन सुरेन महर्जन, रंग संयोजन दिपेश चौधरी र साउन्ड डिजाइन श्रवल आरपीले गरेका छन् । पाश्र्व संगीतमा रोहित शाक्य छन् भने ‘मामी’ लाई काठमाडौं उपत्यकामा काफिया फिल्मस् र मोफसलमा कुवेर सिने डिस्ट्रीब्युसनले वितरण गर्नेछन् ।