प्रतीक्षित फिल्म ‘वसन्त’को पोस्टर सार्वजनिक, प्रकाश सपूतको अभिनयसँगै डेब्यु निर्देशन

इटहरी/ आउँदो चैत २२ मा रिलिज हुने गायक तथा प्रकाश सपूतको प्रतीक्षित डेब्यु निर्देशन ‘वसन्त’को पोस्टर सार्वजनिक भएको छ । आफ्नै लेखन, निर्देशन, निर्माण, अभिनय, गायन र संगीत समेटिएको यो फिल्मलाई प्रकाशले आफ्नो ‘ड्रिम प्रोजेक्ट’ भन्दै अगाडि बढाईरहेका छन् । सार्वजनिक पोस्टरमा प्रकाश अध्ययनशील पात्रको रूपमा प्रस्तुत छन्, जहाँ उनी केही लेखिरहेका र गहिरो सोचमा मग्न देखिन्छन् ।

सार्वजनीक पोस्टरमा देखिएको टेबुलमा किताबको चाङ र भित्तामा लक्ष्मीप्रसाद देवकोटा तथा पारिजातका तस्बिरहरूले उनलाई साहित्य रचना गरिरहेको संकेत गर्छ । ‘वसन्त’ निर्माणका क्रममा आइपरेका चुनौतीबारे प्रकाशले लामो स्टाटस लेख्दै आफ्नो अनुभव समेत बाँडेका छन् । उनले यो फिल्म बनाउन आफूले गीत, स्टेज कार्यक्रम र प्रचार-प्रसार जस्ता काममा समय दिन नसकेको उल्लेख गरेका छन् । यो कारणले आलोचना खेप्नुपरेको भए पनि फिल्मको सफलताबाट ती सबै गुमेका कुरा फिर्ता हुनेमा उनी आशावादी छन् ।

उनले फिल्मको लागि संगीतबाट कमाएको, समय, साथीभाइ र आराम त्याग्नु परेको उल्लेख गर्दै ‘वसन्त’लाई आफ्नो जीवनकै ठूलो सपना पूरा गर्न गरिएको प्रयास भनेका छन् । ‘वसन्त’ निर्माणको क्रममा नयाँ गीत सार्वजनिक नगर्नु र देश–विदेशका कार्यक्रमहरूमा सहभागी हुन नपाउनु आफ्नो लागि गम्भीर त्याग भएको बताए । उनले भनेका छन्, ‘मैले ‘वसन्त’मा मभित्रका सबै रङ्गहरू पोखेको छु । यदि ‘वसन्त’ तपाईंलाई बबाल लाग्यो भने, म बबाल हुँ । यदि लागेन भने मेरो प्रतिभाको दायरा यति नै हो । समयले खोसेका सबै कुरा फिर्ता दिने विश्वासका साथ यो फिल्म बनाएको हुँ ।’

प्रकाशसँगै यो फिल्ममा स्वस्तिमा खड्का, खड्गबहादुर पुन, प्रभात पाल, श्री शिभांसी र उर्मिला लाम्गादेले अभिनय गरेका छन् । गलबन्दी प्रोडक्सनको ब्यानरमा बनेको ‘वसन्त’मा मोहन विश्वकर्मा र विन्दू बोहरा निर्माता छन् भने कार्यकारी निर्मातामा अनुरोध भट्टराई, नाना थकाली र वीरेन्द्रनारायण श्रेष्ठ छन् । प्रकाशको डेब्यु फिल्म ‘परदेशी-२’ सुपरहिट भएपछि हालै प्रदर्शनमा आएको ‘पूर्णबहादुरको सारङ्गी’ले पनि सफल व्यापार गर्‍यो । निर्देशनमा समेत आफ्नो क्षमता देखाउन तयार भएका प्रकाशको यो पहिलो निर्देशित फिल्म ‘वसन्त’प्रति दर्शकले ठूलो अपेक्षा राखेका छन् ।