‘एक्टर: टेक वान’ गीत: कस्को प्रेममा प्रदिप ? आना की दिव्या

इटहरी/ नेपाली फिल्म ‘एक्टर: टेक वन’को ‘के भरोसा गरम’ बोलको गीत तथा भिडियो सार्वजनिक गरिएको छ । निर्माण युनिटले आज शनिवार यो गीतको भिडियो सार्वजनिक गरेसँगै फिल्मको थप चर्चा सुरु भएको छ । माघ १६ गते प्रदर्शनमा आउने यस फिल्मको गीतमा प्रदिप खड्का, आना शर्मा र दिव्या रायमाझीबीचको त्रिकोणात्मक प्रेम देखाइएको छ । यो गीतले दर्शकलाई फिल्मप्रति अझ नजिक ल्याउने अपेक्षा गरिएको छ ।

गीतमा देखाइएका दृश्यहरूले प्रदिप खड्काको भूमिकाप्रति रहस्य थपेको छ । आनासँगको दृश्यमा बोल्न सक्ने र दिव्यासँगको दृश्यमा बोल्न नसक्ने पात्रले प्रदिपलाई दोहोरो भूमिकामा प्रस्तुत गरिएको हो कि भन्ने अनुमान गर्न सकिन्छ । सार्वजनीक गीतमा हर्कुलस बस्नेत र इन्दिरा जोशीको आवाज रहेको छ भने शब्द उर्मिला गुरुङको र सङ्गीत हर्कुलसकै रहेको छ । किरण थापाको कोरियोग्राफी र राजेन्द्र मोक्तानको कलर ग्रेडिङले भिडियोको प्रस्तुतीलाई उत्कृष्ट बनाएको छ । हेर्नुस् भिडियो ।

राजन भुसालले निर्देशन गरेको यो फिल्मको स्क्रिप्ट उनले आकाश बरालसँग मिलेर तयार पारेका हुन् । प्रदिप, आना र दिव्याका साथै राजबल्लभ कोइराला, दिव्य देव, उषा रजक, सृजना अधिकारी र सुशील सिटौलालगायतका कलाकारहरूको समेत प्रमुख भुमिकामा अभिनय रहेको छ । ‘एक्टर: टेक वन’ अधृत फिल्म्स र मोती फिल्मको संयुक्त प्रस्तुति हो ।

थमन कुमार भण्डारी निर्माता, मोती कार्की क्रियटिभ निर्माता र अनीश भुसाल सह-निर्माताका रूपमा रहेका छन् । यो फिल्म छायाङ्कन नरेन्द्र मैनालीले गरेका हुन् भने सम्पादन निमेष श्रेष्ठले गरेका छन् । सङ्गीतमा हर्कुलससहित रोहित शाक्य र एलिस कार्की पनि सामेल छन् । रिलिजको मिति नजिकिँदै गर्दा सार्वजनिक भएको गीत ‘के भरोसा गरम’ले फिल्मको प्रचारलाई थप बलियो बनाएको छ । रहस्यपूर्ण कथा र प्रेमकथाको सम्मिश्रण रहेको यो फिल्मलाई दर्शकले उत्सुकताका साथ प्रतीक्षा गरिरहेका छन् ।