पूर्व मिस पूर्वाञ्चल पूजा श्रेष्ठ स्कुटर दुर्घटनामा गम्भीर घाईते, श्रीमान निश्चलको निधन

इटहरी/ कोशी प्रदेशको धरानबाट लामो समयदेखि आयोजना हुँदै आइरहेको मिस पूर्वाञ्चलमा सहभागी भएर सन् २०१८ मा आयोजना भएको प्रतियोगिताको ताज जितेकी भद्रपुर झापाकी पूजा श्रेष्ठ स्कुटर दुर्घटनामा परी घाइते भएकी छन् । स्कुटरमा उनको साथमा रहेका श्रीमान निश्चल राजभण्डारीको भने निधन भएको छ ।

निश्चलको नर्भिक अस्पतालमा उपचारको क्रममा निधन भएको जिल्ला प्रहरी परिसर भक्तपुरका डिएसपी ढुण्डिराज न्यौपानेले जानकारी गराए । श्रीमान निश्चलले चलाइरहेको बा.प. ०२०२८ प ६६१० नम्बरको स्कुटरको पछाडि श्रीमती पूजा थिइन् । बजारमा किनमेल गरेर भक्तपुर घर फर्कने क्रममा कुकुरले अचानक बाटो काटेपछि स्कुटर अनियन्त्रित भई दुर्घटना हुन पुगेको थियो ।

पूजाको यतिबेला भक्तपुरमा रहेको इन्टरनेशनल हस्पिटलमा उपचार भइरहेको छ । निश्चल र पूजा विवाह पश्चात पढाईको सिलसिलामा अष्ट्रेलिया बस्दै आएका थिए । केहीअघि नेपाल आएका उनीहरू मुलघरमा भेटघाट पश्चात पुनः अष्ट्रेलिया फर्कने तयारीमा थिए । तर, दुःखद दुर्घटनाले यी दम्पतीको सपनाहरूको समेत अवसान भएको छ । मृतक निश्चल भद्रपुर नगरपालिकाका पूर्व उपप्रमुख चन्दा श्रेष्ठका एकमात्र छोरा हुन् ।