इटहरी/ “के छ हजुर ? ठीक छ हजुर” भन्दै आम नेपालीमाझ भाईरल भएका बालगायक सचिन परियारको दुःखद निधन भएको छ । बिहीबार बिहान महाराजगन्जस्थित त्रिवि शिक्षण अस्पतालमा सचिनको निधन भएको हो । निमोनियाका कारण गम्भीर अवस्थामा रहेका ११ वर्षीय परियारले करिब ४ देखि ५ दिनसम्म आईसीयूमा उपचार गराइरहेपछि ज्यान गुमाएका हुन् ।
अस्पताल प्रशासनका अनुसार ‘सिभियर निमोनिया’ का कारण ‘पल्मोनरी ह्यामेरेज’ भएको थियो । स्वास्थ्य अवस्थाको निरन्तर खराबीले उनको ज्यान बचाउन असम्भव बनाएको बताइएको छ । भाइरल बालगायकका रूपमा चिनिएका सचिनले “रातो रबर एक,” “रुमाल खस्छ कि,” “के छ र हजुर,” र “बरको छायाले” जस्ता लोकप्रिय गीत गाएका थिए ।
यी गीतहरूले उनलाई बालप्रतिभाका रूपमा देशभर चर्चित बनाएको थियो । साथै, उनले अभिनेता राजेश हमालसँग एक म्युजिक भिडियोमा अभिनय गरेका थिए भने चर्चित हास्य शृङ्खला ‘मेरी बास्सै’मा पनि आफ्नो अभिनय कला देखाएका थिए । सचिनको निधनले नेपाली सङ्गीत र मनोरञ्जन क्षेत्रलाई निराश बनाएको छ । बाल्यकालमै आफ्नो प्रतिभा देखाएका परियारको अकाल मृत्युले धेरैलाई स्तब्ध बनाएको छ ।
Discussion about this post