इटहरी/ भुटानी नेपाली समुदायको सांस्कृतिक संघर्ष र प्रेमकथा समेटिएको म्युजिक भिडियो ‘सानुमाया’ सार्वजनिक भएको छ । भिजुअल आर्ट्स स्टुडियो र टौवा स्टुडियोको सहकार्यमा निर्माण भएको यस भिडियोले पहिचान, प्रेम र सामाजिक द्वन्द्वका गहिरा भावनाहरूलाई पर्दामा उतारेको छ । विवेक रसाइलीको निर्देशनमा बनेको यस भिडियोमा मिरुना मगर, दीपक रसाइली र प्रेम सुब्बाको अभिनय रहेको छ ।
मिरुनाले निर्वाह गरेको पात्रले आफ्नो करियर र प्रेमबीचको संघर्षलाई जीवन्त रूपमा पर्दामा उतार्दै समाजमा पहिचानको अभावले ल्याउने द्विविधालाई उजागर गरेको छ । ‘सानुमाया’ ले भुटानी नेपाली समुदायको सांस्कृतिक महत्त्व र प्रेमको गहिराइलाई भावुक तर प्रभावकारी रूपमा प्रस्तुत गरेको छ । हेर्नुस् भिडियो ।
कथा र सांगीतिक संयोजनले दर्शकलाई पात्रहरूको भावनामा डुब्न प्रेरित गर्छ । यस म्युजिक भिडियोका कार्यकारी निर्माता विजय बस्याल हुन् भने रेजोन थापा सहायक निर्देशक र उज्ज्वल जोशी छायाकारको भूमिकामा छन् । भिजुअल आर्ट्स स्टुडियोको आधिकारिक युट्युब च्यानलमार्फत सार्वजनिक गरिएको ‘सानुमाया’ले दर्शकलाई भुटानी नेपाली समुदायको जीवन र संघर्षलाई नजिकबाट अनुभव गराउने अवसर प्रदान गर्नेछ ।
Discussion about this post