इटहरी/ निर्देशक सुदीप भुपाल सिंहको ७ वर्षपछि निर्देशनमा कमब्याक भएको फिल्म ‘श्री बुकुरो : द होम कलिङ’को बुधबार टिजर सार्वजनिक भएको छ । यसअघि ‘माला’ र ‘रुद्रप्रिया’ निर्देशन गरेका सिंहले यो पटक ग्रामीण परिवेशमा आधारित पारिवारिक कथा प्रस्तुत गरेका छन् । सार्वजनिक टिजरको सुरुवात फिल्मकी मुख्य कलाकार लक्ष्मी गिरीले बाचन गरेको कविताबाट हुन्छ । जसले कथाको भावनात्मक पक्ष उजागर गर्छ ।
प्रमुख पात्रहरू लक्ष्मी गिरी र आशीर्वाद क्षेत्रीलाई मोटरसाइकलमा गाउँ फर्किंदै गरेको देखाइएको टिजरले एक परिवारको जीवनकथा केन्द्रमा रहेको सङ्केत गरेको छ । फिल्म रेञ्जको ब्यानरमा निर्माण भएको यस फिल्ममा आशीर्वाद क्षेत्री, लक्ष्मी गिरी, निकिता आचार्य, प्रतिकराज आचार्य, रोशनी कार्की, राजन इशान, दीपिका थापा, लय संग्रौला, मोहन निरौला लगायतका कलाकारहरूको अभिनय रहेको छ । हेर्नुस् टिजर ।
फिल्मको कथा स्वयं निर्देशक सिंहले लेखेका हुन् भने निर्माण रुबी सेन सिंहले गरेकी छन् । सञ्जय लामा र राजेश श्रेष्ठले छायांकन गरेको यो फिल्म मुस्ताङ, बाग्लुङ, कास्की, दमौली, मकवानपुर र काठमाडौंका रमणीय स्थानहरूमा छायांकन गरिएको हो । प्रदर्शन मिति तय नभैसकेको फिल्मको गीतहरूमा रञ्जित गजमेर र बसन्त सापकोटाको संगीत रहेको छ । निर्देशक सिंहका अनुसार यो फिल्मको प्रदर्शन मिति चाँडै घोषणा गरिने छ ।
Discussion about this post