फिल्म ‘ऊनको स्वीटर’को ‘मखमली’ गीतको भिडियो सार्वजनिक

इटहरी/ २०८२ सालको वैशाख २६ गते प्रदर्शनको तयारीमा रहेको नेपाली फिल्म ‘ऊनको स्वीटर’को नयाँ गीत ‘मखमली’ सार्वजनिक भएको छ । तमु ल्होसारको अवसर पारेर बिहीबार सार्वजनिक गरिएको यो गीत लोकभाका ‘कौडा/चुट्का’मा आधारित छ । जसले प्रेम, वियोग, हास्यव्यङ्ग्य र सामाजिक सन्देशलाई सरल र सिर्जनशील ढङ्गले प्रस्तुत गर्दछ । फिल्मका मुख्य पात्र विपिन कार्की र मिरुना मगरबीचको मौन प्रेमलाई ‘मखमली’ले विशेष तरिकाले उजागर गरेको छ ।

पाँचथर र नेपाल-भारत सीमाको फालेलुङ क्षेत्रमा छायाङ्कन गरिएको यस गीतमा गण्डक क्षेत्रको चर्चित कौडा भाका र पाँचथरको सांस्कृतिक विशेषता मिश्रित गरिएको छ । सार्वजनिक गीतमा सुजन चापागाईँ र सुनिता थेगीमको स्वर रहेको छ भने हर्क साउदको शब्द र चापागाईँकै सङ्गीत समावेश गरिएको छ । भिडियोमा दीप गुरुङको कोरियोग्राफी रहेको छ । हेर्नुस् भिडियो ।

‘ऊनको स्वीटर’ फिल्म आर्टमाण्डू प्रा.लि.ले निर्माण गरेको पहिलो फिचर फिल्म हो । यो कम्पनीले यसअघि ‘घुमी घुमी,’ ‘देखेर तिमीलाई-तीन पाते,’ र ‘चन्द्रमा’ जस्ता हिट म्युजिक भिडियोहरु निर्माण गरेको थियो । नवीन चौहानद्वारा निर्देशित यो फिल्ममा विपिन कार्की, मिरुना मगर, सुनिल पोखरेल, माओत्से गुरुङ, विल्सन बिक्रम राईलगायतका कलाकारहरूको अभिनय रहेको छ । फिल्ममा सिनेमाटोग्राफी चिन्तन राजभण्डारीले गरेका हुन् भने सम्पादन कृष्ण भण्डारीको रहेको छ । यो फिल्मको वितरण काफिया फिल्म्स प्रा.लि. र कुबेर सिने डिस्ट्रीब्युसनले गर्नेछन् ।