इटहरी/ नेपालको लोकप्रिय फिल्म शृङ्खला ‘होस्टेल’को तेस्रो संस्करण ‘होस्टेल ३’ को मुख्य छायाङ्कन ४९ दिनमा शुक्रवार सम्पन्न भएको छ । निर्देशक सशान कँडेलका अनुसार, केही कलाकारहरूको बडी ट्रान्सफर्मेसन अर्थात शारीरिक परिवर्तन आवश्यक पर्ने भएकाले थप एक हप्ताको फुटकर छायाङ्कन बाँकी रहेको छ । यतिबेला पोस्ट-प्रोडक्सनको चरणमा रहेको यो फिल्म फागुन १६ मा रिलिज हुने भनिए पनि सो मितिमा प्रदर्शन नहुने भएको छ ।
निर्माण टिमले नयाँ रिलिज मिति छिट्टै घोषणा गर्ने बताईएको छ । ‘होस्टेल’ शृङ्खलाले नेपाली फिल्म उद्योगमा नयाँ प्रतिभा भित्र्याउने प्लेटफर्मको रूपमा ख्याति कमाएको छ । यस शृङ्खलाबाट अनमोल केसी, स्वस्तिमा खड्का, सुशील श्रेष्ठ, नजिर हुसेन, सलोन बस्नेत, प्रकृति श्रेष्ठ, र सुशील सिटौला जस्ता अहिलेका चर्चित कलाकारहरूले आफ्नो करियर सुरु गरेका थिए ।
यसपटकको ‘होस्टेल ३’ मा पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँ, रोहन श्रेष्ठ, र आशिष पुरुषलगायतका कलाकारहरूको अभिनय रहेको छ ।
माधव शर्माको यो फिल्मको स्क्रिप्ट तयार गरेका हुन् भने कथा निर्देशक कँडेलकै हो । सम्मान इन्टरटेन्मेन्ट र आरोन कन फिल्म्सको सहकार्यमा निर्माण गरिएको फिल्मका डिओपी अर्जुन तिवारी हुन् । सिनेमाटोग्राफी बुद्ध थापा र मनोज खत्रीले गरेका छन् । निर्माण टिममा सुदिप कुँवर मुख्य सहायक निर्देशक, यम प्रसाद ओली प्रोडक्सन डिजाइनर, शङ्कर कोइराला कार्यकारी निर्माता, कर्ण कार्की र गोविन्द अधिकारी निर्माता, तथा सुरेश कँडेल सह-निर्माताको रुपमा रहेका छन् ।
Discussion about this post