इटहरी/ अभिनेता दयाहाङ राई अभिनीत फिल्म ‘कार्साङ’ पुस २६ देखी प्रदर्शन हुँदैछ । यो फिल्म मार्फत दयाहाङ करिब ६ महिनापछि ठूलो पर्दामा फर्किन लागेका हुन् । यसअघि रिलिज भएको उनको फिल्म ‘घर ज्वाईं’ असार २८ मा प्रदर्शन भएको थियो । त्यसपछि उनी कुनै पनि नयाँ फिल्ममा देखिएका छैनन् । लामो समयपछि हलमा फर्किदै गर्दा दयाहाङले दर्शकको माया र साथ पाउने अपेक्षा गरिएको छ ।
फिल्म ‘कार्साङ’ले समाजका भुइँ मान्छेहरूको कथा बोल्ने बताईएको छ । फिल्मको टिजरले गरिबीमा जीवन बिताइरहेका व्यक्तिहरूको संघर्ष र शेर्पा समुदायको संस्कृति झल्काउने संकेत गरिसकेको छ । दयाहाङले यस फिल्ममा अभाव र दुःखबीच आफ्नो समुदायको संस्कार जोगाउन प्रयास गर्ने जिम्मेवार चरित्र निर्वाह गरेको देख्न सकिन्छ । फिल्मले शेर्पा समुदायको जीवनशैली र नेपाली समाजको विविध आयाम प्रस्तुत गर्ने निर्माणपक्षको भनाई छ ।
यो फिल्ममा दयाहाङसँगै डेब्यु अभिनेत्री सिर्जना निङलेखु, जितु नेपाल, दीया मास्के, बुद्धि तामाङ, सृष्टि गौतम, डोमा ह्योल्मो, प्रेम लोप्चन, र सुरवीर पण्डित लगायतका कलाकारहरूको अभिनय छ । यो फिल्मको निर्देशन यम शेर्पाले गरेका हुन्, जो यसै फिल्ममार्फत निर्देशकका रूपमा डेब्यु गर्दैछन् भने यसको कथा पनि निर्देशक यम शेर्पाले नै लेखेका हुन् । फिल्म यार्सा फिल्म्स र पुरुषोत्तम प्रधान फिल्मसको प्रस्तुतिमा बनेको हो ।
कार्साङलाई पुरुषोत्तम प्रधानले छायांकन र निर्माण गरेका छन् भने गोविन्द बोहराले सहनिर्माणको जिम्मेवारी सम्हालेका छन् । कार्यकारी निर्माता आङछिरिङ शेर्पा हुन् । दयाहाङ राईलाई प्रायः मौलिक कथावस्तुका फिल्ममा देखिने कलाकारका रूपमा चिनिन्छ । ‘कार्साङ’ पनि त्यही शैलीको फिल्म हो, जसले हाइफाइ शैलीभन्दा पृथक भई नेपाली समाजको यथार्थ कथा प्रस्तुत गर्नेछ । निर्देशक यम शेर्पा र दयाहाङको यो सहकार्यले फिल्मप्रेमीहरूलाई कत्तिको प्रभावित पार्छ ? त्यो भने प्रदर्शनपछि नै थाहा हुनेछ ।
Discussion about this post