इटहरी/ हलिउड फिल्मको झल्को दिने नेपाली फिचर फिल्म ‘एक्लो’निर्माण युनिटले आफ्नो क्यारेक्टर पोस्टर सार्वजनिक गरेको छ । साइन्स फिक्सनमा आधारित यस फिल्मले दुई मुख्य पात्र हलिउड अभिनेता जेमी बेकन र नेपाली अभिनेत्री कविता नेपालीको क्यारेक्टर पोस्टर सार्वजनिक गरिएको हो । पोस्टरको स्तरले फिल्म भव्य हुने अपेक्षा गर्न सकिन्छ । फिल्मका निर्देशक प्रदीप शाही हुन्, जसले यसलाई आफ्नो तेस्रो निर्देशनात्मक फिल्मको रुपमा अघि सारेका छन् ।

लामो समयदेखि बेलायतमा बस्दै आएका शाहीले ‘एक्लो’ लाई हलिउड स्तरको बनाउन विशेष रुपमा लागीपरेका छन् । हाल फिल्मको पोस्ट-प्रोडक्सन लण्डनमा भइरहेको छ । प्रदर्शन मिति भने सम्पूर्ण निर्माणकार्य पूरा भएपछि मात्र घोषणा गरिने जानकारी निर्माण युनिटले गराएको छ । यस फिल्ममा प्रदीप खड्का, विजय लामा, सुनील थापा, दिया पुन, वेनिशा हमाल, दिनेश डीसी, सुरज सिङ ठकुरी र बेलायती अभिनेता जेमी बेकनसहितको उत्कृष्ट स्टारकास्टहरु रहेका छन् ।

बाल कलाकार जेमिन श्रेष्ठ र स्योन सविक सिङको पनि विशेष भूमिका रहेको छ । फिल्मका निर्माता राजु कुमार गुरुङ, हरि श्रेष्ठ, विष्णु तामाङलगायत हुन् भने कार्यकारी निर्माताको जिम्मेवारी विनोद सुवेदी क्षितिजले सम्हालेका छन् । छायाङ्कन बाबु श्रेष्ठले गरेका हुन् भने द्वन्द्व निर्देशन राजु तामाङको रहेको छ । ‘एक्लो’ ले नेपाली चलचित्रलाई अन्तर्राष्ट्रिय स्तरमा पुर्यायाउने महत्वाकांक्षा बोकेको छ । पोस्टर सार्वजनिक भएपछि दर्शकहरूले सिनेमा प्रदर्शनको प्रतिक्षा गर्न थालेका छन्।