रिलिज मिति तय गर्दै पोस्टरमा ‘पिताम्बर’, हालसम्मकै फरक अवतारमा प्रदिप

इटहरी/ अभिनेता सौगात मल्ल, प्रदीप खड्का र दयाहाङ राई अभिनीत फिल्म ‘पिताम्बर’को प्रदर्शन मिति घोषणा गरिएको छ । शुक्रबार सार्वजनिक पोस्टरमार्फत निर्माण टिमले यो फिल्म नेपाली नयाँ वर्षको अवसर पारेर चैत्र २९ गते प्रदर्शन गर्ने जानकारी दिएको हो । कृषा चौलागाई निर्देशित ‘पिताम्बर’लाई निर्देशकको ड्रिम प्रोजेक्टका रूपमा हेरिएको छ । ७० दिन लामो सेड्युलमा फिल्मको छायांकन पूरा भएको बताइएको छ ।

सार्वजनिक पोस्टरले यसलाई एक्सनप्रधान फिल्म भएको झल्को दिएको छ । पोस्टरमा मुख्य तीन पात्र प्रदीप खड्का, सौगात मल्ल र दयाहाङ राईको आक्रामक र भावुक प्रस्तुतिलाई फिचर गरिएको छ । रगताम्मे अवतारमा देखिएका प्रदीप, बन्दुक चलाउँदै गरेका सौगात र रिसले भरिएको दयाहाङको अनुहारले फिल्मको गहनता प्रष्ट पारेको छ ।

‘पिताम्बर’मा बलियो कलाकारहरूको उपस्थिति रहेको छ । सौगात, प्रदीप र दयाहाङसँगै दिव्या रायमाझि, अनुपविक्रम शाही, सुरक्षा पन्त, प्रमोद अग्रहरी, दिव्यदेव, सुपुष्पा भट्ट, कामेश्वर चौरासिया, गौरव विष्ट, विशाल पहारीलगायतको समेत अभिनय देख्न सकिन्छ । फिल्मको पहिलो चरणको छायांकन नवलपरासीको त्रिवेणीधाममा चैत्र महिनामा शुभमुहूर्त गर्दै सुरु गरिएको थियो ।

केपी फिल्म्स र पुरुषोत्तम प्रधान फिल्म्सको सहकार्यमा निर्माण भएको यो फिल्मको छायांकन पुरुषोत्तम प्रधानले गरेका हुन् । विशाल चौलागाई निर्माता रहेको फिल्मको लेखन प्रदीप भारद्धाजले गरेका छन् भने द्धन्द्व निर्देशन हिमाल केसीको रहेको छ । ‘पिताम्बर’लाई निर्देशक कृषाले लार्ज स्केलमा तयार पारेकी छन् । करिब ५ करोडको बजेटमा निर्माण भएको यो फिल्म कृषाको दोस्रो निर्देशन हो । उनले यसअघि ‘ऐंचो पैंचो’ निर्देशन गरेकी थिइन्, जसले दर्शक र समीक्षकबाट प्रशंसा बटुल्न सफल भएको थियो ।