इटहरी/ प्रकाश सपुतको डेब्यु निर्देशनमा बनेको फिल्म ‘बसन्त’को छायांकन ३८ दिनमा सम्पन्न भएको छ । निर्माण टिमका अनुसार बुधबार काठमाडौंमा अन्तिम सट खिचेर इन्डक्ल्याप गरिएको हो । चैत्र २२ गते चैते दशैंको अवसरमा प्रदर्शनको तयारीमा रहेको यस फिल्ममा निर्देशक सपुतले आफ्नो टिमसँग मिलेर कडा मेहनत गरेको बताएका छन् । उनले फिल्म आफ्नो सोचअनुसारको नतिजा दिनेमा पूर्ण विश्वास व्यक्त गरेका छन् ।
‘बसन्त’को छायांकन प्रकाश सपुतको जन्मथलो बागलुङ, काठमाडौं र तराईका विभिन्न स्थानमा गरिएको हो । फिल्ममा प्रकाश सपुतसँगै स्वस्तिमा खड्का, प्रभात पाल ठकुरी, खड्ग बहादुर पुन (खबपु), शिवांशी श्री, अनुप बराल, कमलमणी नेपाल र प्रकाश घिमिरेजस्ता कलाकारको अभिनय रहेको छ ।
सामाजिक कथावस्तुमा आधारित यो फिल्मको कथा, पटकथा र संगीत पनि सपुतले नै तयार पारेका छन् । विपन्न विश्वकर्मा समुदायका एक युवकको लेखक बन्ने सपना र त्यसका लागि गरेको संघर्षको कथा ‘बसन्त’ले भन्नेछ । गलबन्दी प्रोडक्सनको प्रस्तुतिमा निर्माण भएको यस फिल्मका कार्यकारी निर्माता मोहन विश्वकर्मा, अनुरोध भट्टराई र नाना थकाली हुन् । फिल्मका छायाकार सुसन प्रजापति हुन् ।
Discussion about this post