फिल्म ‘मिसिङ: केटि हराएको सुचना’को नयाँ प्रदर्शन मिति माघ ११ गते

इटहरी/ अभिनेत्री सृष्टि श्रेष्ठ र अभिनेता नाजिर हुसेन अभिनीत फिल्म ‘केटी हराएको सूचना’ अब माघ ११ गते (२४ जनवरी २०२५) मा रिलिज हुने भएको छ । वितरण कम्पनी एप्पल इन्टरटेनमेन्टले नयाँ मिति सार्वजनिक गर्दै फिल्मले यसपटक सोलो प्रदर्शन पाउने सम्भावना रहेको जनाएको छ । यसअघि ‘पूर्णबहादुरको सारङ्गी’को बक्स अफिस प्रभावका कारण यो फिल्मको प्रदर्शन स्थगित गरिएको थियो ।

सो बेला यो फिल्मको देशव्यापी व्यापक प्रचारप्रसार गरिएको थियो । निर्देशक दीपेन्द्र गौचनले यो फिल्ममार्फत तीन दशकपछि निर्देशनमा पुनरागमन गरेका छन् । ‘उजेली’ टेलिश्रृंखलाबाट ख्याती कमाएका गौचनले यसपटक मधेशी र पहाडी समुदायबीचको भावनात्मक सम्बन्धको कथा पर्दामा ल्याउन खोजेका छन् ।

फिल्ममा हुसैन र श्रेष्ठको अलावा सञ्जय गुप्ता, रामनारायण ठाकुर, मदन ठाकुर, रीना रिमाल, कौशल्या ठाकुर, ललितादेवी मिश्र, रुपेश मण्डल, सुदीप पटेल, अनिल कुर्मी, मनोज शाह, अर्जुन पोखरेल र ओमप्रकाश कर्णलगायत कलाकारको अभिनय रहेको छ । एप्पल इन्टरटेनमेन्टका प्रमुख नकिम उद्दिनको निर्माण कम्पनी ट्राई–सिटी पिक्चर्सले निर्माण गरेको यो फिल्मको ट्रेलरले दर्शकहरूमा चासो बढाएको छ ।