इटहरी/ आउँदो पुस ५ गते रिलिज हुने अभिनेता सौगात मल्ल अभिनीत फिल्म ‘बम बहादुर’को ट्रेलर सार्वजनिक भएको छ । ट्रेलरले सस्पेन्स, थ्रिल र सोसल ड्रामाको झल्को दिनुका साथै साहस र सङ्घर्षको नभनिएको कथालाई उजागर गरेको छ । विद्रोही भूमिकामा देखिएका सौगात मल्ल ट्रेलरको केन्द्रमा छन् । फिल्मले भारतको दार्जिलिङ क्षेत्रको कथा प्रस्तुत गर्दै “अब खुकुरी र बन्दुकले होइन, दिमागले लडौँ” भन्ने सन्देश स्थापित गरेको छ ।
ट्रेलरमा एक युवाको मुक्ति सङ्घर्षलाई प्राथमिकतामा राखिएको छ भने यसलाई शाहिल खानले सम्पादन गरेका हुन् । निर्देशक जोन राईका अनुसार, यो फिल्म विशेषगरी भारतको दार्जिलिङ र छिमेकी क्षेत्र डुअर्समा बसोबास गर्ने नेपाली समुदायको ऐतिहासिक सङ्घर्षलाई चित्रण गर्ने प्रयास हो । १९८० को दशकमा भएका घटनाहरूमा आधारित यस फिल्मलाई निर्देशकले भारतीय नेपाली समुदायको सङ्घर्षको डिजिटल दस्ताबेजका रूपमा परिभाषित गरेका छन् । हेर्नुस ट्रेलर
फिल्ममा सौगात मल्लसँगै प्रशान्त राई, अनिशा रसाइली, भास्कर प्रधान, महेन्द्र बग्दास, मदन भुजेल, भरत वशिष्ठ, शान्तिला तामाङलगायतको अभिनय रहेको छ । बाल कलाकार वशिस्ट कार्कीले पनि विशेष भूमिकामा अभिनय गरेका छन् । निर्माता सञ्जीव सार्कीले यो फिल्मले नेपाली समुदायको इतिहासलाई जगेर्ना गर्ने उद्देश्य लिएको बताए । बिस्ट ब्रदर्स फिल्म्स प्रा.लि.को निर्माणमा तयार भएको फिल्मको कथा र पटकथा जोन राई र रुपेश तामाङले लेखेका हुन् ।
फिल्मका छायाङ्कन सुजोय कुमार घोष ‘मुन्ना’ले गरेका छन् भने सम्पादन ज्ञान गुरुङको रहेको छ । फिल्मको सङ्गीत र गीत दीपङ्कर सिंह मुखियाले तयार गरेका हुन् भने ब्याकग्राउन्ड स्कोर इजाज अलीको रहेको छ । यसमा कलरिस्ट कुनाल कुँवर, साउन्ड मिक्सर मुकेश शाह, र लाइन प्रोड्युसर प्रकाश हमाल रहेका छन् । पोस्ट प्रोडक्शन नेपालमा क्लासिक सिने युनिभर्स र भारतमा हिलिङ अक्टेभ्ज स्टुडियोमा गरिएको हो । नेपाल र भारतमा एकैसाथ रिलिज हुने यो फिल्मको वितरण रिच इन्टरटेन्मेन्ट र एफडी कम्पनीले गर्नेछ । ‘बम बहादुर’ एक सन्देशमूलक र ऐतिहासिक फिल्मका रूपमा दर्शकको मन जित्ने अपेक्षा गरिएको छ ।
Discussion about this post