इटहरी/ नेपाली फिल्म उधोगको इतिहासमा सबै रेकर्ड तोड्न सफल हाल हलमा प्रदर्शन भइरहेको फिल्म ‘पूर्णबहादुरको सारङ्गी’ को निर्माता कम्पनी सेभेन सिजले यसको दोस्रो सिक्वेल निर्माणको घोषणा गरेको छ । पहिलो सिक्वेलको अपार सफलताले हौसिएर निर्माण टिमले आगामी वर्ष, २०८३ मा नयाँ श्रृंखला रिलिज गर्ने योजना सार्वजनिक गरेको हो । यो फिल्मले गन्धर्व समुदायको संघर्ष र बुबाले छोराका लागि गरेको बलिदानको मार्मिक कथा प्रस्तुत गरेको छ ।
निर्देशक सरोज पौडेलले आफ्ना पिताको निधनपछि अनुभव गरेको भावनात्मक अवस्थाबाट प्रेरित भएर यो कथा लेखेका थिए । फिल्ममा विजय बराल मुख्य भूमिकामा छन् । उनिसंगै प्रकाश सपूत, बुद्धि तामाङ, अञ्जना बराइलीको समेत प्रमुख भुमिकामा अभिनय रहेको छ । फिल्म प्रदर्शन ताका धेरै दर्शकले आमाको देन, त्याग र दुखलाई पनि देखाउनुपर्ने र आमाको भुमिका पनि निकै महत्त्वपूर्ण हुने प्रतिक्रिया दिएका थिए । अब दोस्रो सिक्वेलको कथा मुख्यतया महिला पात्र ‘बाटुली’लाई केन्द्रमा राखेर निर्माण गरिनेछ ।
यस पटकको कथा नयाँ स्वरूपमा प्रस्तुत हुने बताइएको छ । निर्माण कम्पनीले यसलाई अझ उत्कृष्ट बनाउने तयारी गरिरहेको छ । सेभेन सिज सिनेमाज र बासुरी फिल्मस्को संयुक्त प्रस्तुति रहेको यस फिल्मको निर्माता विनोद पौडेल र प्याट्रिक सुवेदी हुन् । फिल्मले प्रदर्शनको पहिलो सातामै ८ करोड २५ लाख रुपैयाँ ग्रस कमाई गरेर नयाँ कीर्तिमान कायम गरेको थियो । एकैदिन ४६५ शो पाउनु र अझै पनि हाउसफुल प्रदर्शन भइरहनु यसको लोकप्रियताको उदाहरण हो । ‘पूर्णबहादुरको सारङ्गी’को दोस्रो सिक्वेलले पनि दर्शकको अपेक्षा पूरा गर्दै थप गहिरो प्रभाव पार्ने विश्वास गरिएको छ ।
Discussion about this post