इटहरी/ नेपालमा दर्शकबाट उत्साहजनक प्रतिक्रिया प्राप्त गर्दै दोस्रो सातासम्म सफलतापूर्वक प्रदर्शनमा रहिरहेको फिल्म ‘ह्रस्व दीर्घ’ले अब अष्ट्रेलिया र न्यूजिल्यान्डको यात्रा सुरु गर्न लागेको छ । अभिनेत्री तथा निर्मात्री नीता ढुंगानाले दिएको जानकारी अनुसार यो फिल्म बिहीबारदेखि अष्ट्रेलियाको प्रायः सबैजसो सहरमा युनाइटेड सिनेमाज र भिलेज सिनेमाजको सहकार्यमा प्रदर्शन गरिनेछ ।
फिल्मको नेपालमा मात्र नभई विदेशमा पनि दर्शकको ठूलो माग भैरहेको छ । यही मागलाई ध्यानमा राख्दै अभिनेत्री ढुंगानासहितको टिम अहिले मोफसलमा दर्शकहरूसँग प्रत्यक्ष भेटघाट गरिरहेको छ । ‘ह्रस्व दीर्घ’लाई नीता फिल्म्सको ब्यानरमा निर्माण गरिएको हो भने कार्यकारी निर्माताको भूमिकामा धनञ्जय गलानी रहेका छन् । फिल्मको प्रमुख भूमिकामा हरिहर अधिकारी, नीता ढुंगाना, ब्रह्मानन्दम, कवीर दुहान सिंह, प्रदीप रावत, प्रशान्त ताम्राकार, सञ्चिता लुईटेल, विपना थापा, सरोज खनाल, रवीन्द्र झालगायतका कलाकार छन् ।
कथाकार हरिहर अधिकारी र निर्देशक चन्द्र पन्तको सहकार्यमा तयार भएको यो फिल्मलाई बलिउडका प्रतिष्ठित सिनेमाटोग्राफर कवीरलालले छायांकन गरेका हुन् । चन्द्र पन्तले यसअघि द्धन्द्व निर्देशकको रूपमा आफ्नो पहिचान बनाइसकेका थिए भने यो उनको नेपाली सिनेमा निर्देशनमा डेब्यु हो । नीता ढुंगानाको लगानीमा निर्माण भएको ‘ह्रस्व दीर्घ’ छिट्टै तेलुगु र हिन्दी भाषामा पनि प्रदर्शन हुने तयारीमा छ ।
अष्ट्रेलिया र न्यूजिल्यान्डमा फिल्मको वितरणको जिम्मा लिएको सेभेन सिजले नेपाली फिल्मको अन्तर्राष्ट्रिय बजार विस्तारमा महत्वपूर्ण भूमिका खेल्दै आएको छ । नेपालमा उत्साहजनक व्यावसायिक प्रदर्शन गरिरहेको यो फिल्मले अब विदेशका दर्शकहरूमाझ कस्तो प्रभाव पार्छ भन्ने चासोको विषय बनेको छ ।
Discussion about this post