इटहरी/ ‘याक्थुङ सिने अवार्ड २०८१’ मङ्सिर १८ गते धरानमा आयोजना हुने भएको छ । जसले लिम्बु चलचित्र र चलचित्रकर्मीहरूको योगदानलाई सम्मानित गर्ने एक ऐतिहासिक मञ्च समेत बन्ने भएको देखिन्छ । याक्थुङ चलचित्रकर्मी संघ नेपालको केन्द्रिय समितीले आयोजना गर्ने यो अवार्ड कार्यक्रम धरानस्थित बीपी कोइराला स्वास्थ्य विज्ञान प्रतिष्ठानको अडिटोरियम हलमा हुनेछ ।
शनिबार धरानस्थित धरान किचनको सभाहलमा पत्रकार सम्मेलनको आयोजना गर्दै यो जानकारी गराईएको हो । संघका अध्यक्ष नबिन मेन्याङ्बोले अवार्ड समारोहबारे विस्तृत जानकारी दिदै अवार्ड दुई विधामा प्रदान गरिने बताए । ती हुन् फिचर चलचित्र र लघु चलचित्र । चलचित्र विधामा ७ र लघु चलचित्र विधामा ५ अवार्ड वितरण गरिने पत्रकार सम्मेलनमा जानकारी गराईयो ।
फिचर चलचित्र विधामा सर्वोत्कृष्ट चलचित्र, निर्देशक, नायक, नायिका, चरित्र अभिनेता, चरित्र अभिनेत्री र पब्लिक च्वाइस अवार्ड प्रदान गरिनेछ भने लघु चलचित्र विधामा उत्कृष्ट लघु चलचित्र, निर्देशक, अभिनेता, अभिनेत्री र पब्लिक च्वाइस अवार्ड समावेश हुनेछ । अवार्ड समारोहमा २०७९, ८० र ८१ सालमा बनेका फिचर फिल्म र लघु फिल्महरुलाई मात्र समावेश गरिनेछ भने दर्ताको लागी मङ्सिर ५ गतेलाई अन्तिम मिति तोकिएको छ ।
कार्यक्रममा चर्चित कलाकारहरू, विभिन्न तहका प्रतिष्ठित व्यक्तिहरू र लिम्बु भाषाका विशिष्ट चलचित्रकर्मीहरूको उपस्थिति रहने बताईएको छ । अवार्डको जुरीहरूलाई गोप्य राखिए पनि आयोजकले ख्यातिप्राप्त याक्थुङ भाषाका विशेषज्ञ र चलचित्रकर्मीहरूलाई समावेश गरिएको सम्मेलनमा जानकारी गराएको छ । आयोजकका अनुसार दर्ता भएका फिल्महरु जुरिको निर्णय अनुसार उत्कृष्ट फिल्महरु नोमिनेसन गरिनेछ त्यसपछी अवार्ड समारोहमा हरेक अवार्डका लागी ३/३ ओटा फिल्म नोमिनेसनबाट छनौट गरिनेछ । त्यसबाट १ फिल्मलाई अवार्ड वितरण गरिने छ ।
याक्थुङ चलचित्रकर्मी संघको यो प्रयासले नेपाली चलचित्र क्षेत्रमा याक्थुङ भाषाका चलचित्र र कलाकारहरूको योगदानलाई विशेष सम्मान दिनेछ । संघका अनुसार, याक्थुङ सिने अवार्ड नेपाली चलचित्र उद्योगमा याक्थुङ भाषाका चलचित्र र कलाकारहरूको कला र सिर्जनशीलतालाई प्रोत्साहित गर्न र उनीहरूलाई एकत्रित गराउने एक महत्त्वपूर्ण अवसर हुनेछ ।
Discussion about this post