दोहोरी ब्याटलसहित फिल्म ‘पूर्ण बहादुरको सारङ्गी’को ‘रैया चाँदीको’ गीत सार्वजनिक

इटहरी/ फिल्म ‘पूर्ण बहादुरको सारङ्गी’को प्रचारप्रसार स्वरुप यतिबेला देशको विभिन्न प्रमुख शहरहरुमा फिल्मका प्रमुख कलाकारहरू सहित नाटक तथा साङितिक कार्यक्रम भैरहेको छ । यस्तैमा प्रचारलाई थप व्यापक बनाउँदै बिहीबार फिल्मको नयाँ गीत ‘रैया चाँदीको’ सार्वजनिक गरिएको छ । यो गीतमा ‘दोहोरी ब्याटल’ देख्न पाइन्छ, जहाँ पुरुष र महिलाको दुई टिमबीच दोहोरीको रोचक प्रतिस्पर्धा देखिन्छ ।

सार्वजनिक गीतमा आशिष अविरल र मेलिना राईको स्वर रहेको छ भने नवराज पन्तले शब्द लेखेका छन् । गीतलाई आशिषले नै संगीत दिएका छन् । यो दोहोरी ब्याटलमा महिलाले राखेको सर्त अनुसार सुरु गरिएको छ । यदि महिला टिमले जितेमा विजय बराल अन्जना बराइलीको घरमा हली बस्नुपर्नेछ भने पुरुष टिमले जितेमा अञ्जनाले विजयसँग बिहे गर्नुपर्ने सर्त राखिएको छ । हेर्नुस् भिडियो ।

गीतको भिडियोमा फिल्मका प्रमुख कलाकार विजय बराल, मुकुन भुसाल, बुद्धि तामाङ, र अञ्जना बराइली फिचर्ड छन् । यहि कार्तिक १५ गतेबाट सार्वजनिक प्रदर्शनमा आउने फिल्म गन्धर्व समुदायको जीवन र सामाजिक कथामा आधारित छ, जसको कथा र निर्देशन सरोज पौडेलको हो । गीतमा प्रशान्त शिवाकोटीको संगीत र हेमन्त कान्छा रसाइलीको सारङ्गीले फिल्मलाई विशेष बनाएको छ ।

फिल्मका संवाद महेश दवाडीले लेखेका छन् भने यसमा विजय बराल, मुकुन भुसाल, अञ्जना बराइली, प्रकाश सपूत, बुद्धि तामाङ, माओत्से गुरुङ लगायतका कलाकारहरूको अभिनय देख्न पाइन्छ । सेभेन सिज सिनेमा र बासुरी फिल्म्सको संयुक्त प्रस्तुति रहेको यो फिल्मका निर्माता विनोद पौडेल र प्याट्रिक सुवेदी हुन् भने कार्यकारी निर्माता रमेश चौलागाईं, हरि श्रेष्ठ र रमेश ढकाल रहेका छन् ।