इटहरी/ वर्षा राउत र विपिन कार्कीको प्रमुख अभिनय रहेको फिल्म ‘तेल भिसा’को तेस्रो गीत ‘कति रमाइलो’ सार्वजनिक गरिएको छ । मंगलबार काठमाडौमा आयोजित कार्यक्रममा फिल्मको गीत सार्वजनिक गरिएको हो, जसमा वर्षा राउतको ‘बेबी सावर’को दृश्यलाई आकर्षक नाचगानका साथ प्रस्तुत गरिएको छ । निर्देशक शंकर घिमिरेको निर्देशन रहेको यो फिल्मको प्रदर्शन मिति नजिकिँदै गर्दा प्रचारको शृंखला तीव्र हुँदैछ । यसअघि सार्वजनिक गरिएको ‘हरि नाम झैँ’ र ‘तुकुनको मुकुन’ गीतपछि निर्माण टिमले अब अमेरिकामा खिचिएको यो नयाँ गीत दर्शकमाझ ल्याएको हो ।
अञ्जु पन्त र आशिष अविरलको स्वरमा रहेको गीतमा एक नारायण भण्डारीको शब्द छ भने संगीतकार आशिष अविरल स्वयं हुन् । गीतको भिडियोलाई शिशिर खातीले कोरियोग्राफ गरेका छन्, जसमा दीलिप रायमाझी, सुशील क्षेत्री, अरुणिमा लम्साल, उषा पौडेल, विमलेश अधिकारी, अनुराग कुँवरसँगै प्रमुख कलाकारहरू वर्षा र विपिनलाई फिचर गरिएको छ । हेर्नुस् भिडियो ।
भिडियोले दर्शकको बीचमा उत्सुकता थप्ने अपेक्षा गरिएको छ । फिल्मको गीत रिलिज कार्यक्रममा अभिनेत्री ऋचा घिमिरेले १० वर्षपछि नेपाली फिल्ममा फर्किएर काम गर्दा आफूलाई निकै उत्साहजनक महसुस भएको बताइन्। त्यस्तै, वर्षा राउत पनि अमेरिकामा नाटक मञ्चनको कामलाई स्थगित गर्दै यो फिल्मको प्रचारमा नेपाल फर्किएकी छन् । उनले भाइटीकाको भोलिपल्टै पुनः अमेरिका जाने योजना रहेको बताइन् ।
फिल्म आगामी मंसिर ७ गतेबाट प्रदर्शनमा आउँदैछ । बुद्धि तामाङ, सुचित्रा उप्रेती, फ्रान्सिस शेरमन, ज्याक बेललगायतका कलाकारको अभिनय रहेको यो फिल्ममा विपिनले बुबा र छोराको दोहोरो भूमिका निभाएका छन् । निर्माण पक्षका अनुसार फिल्मको ट्रेलर आइतबार सार्वजनिक गर्ने तयारी छ । वेलडन क्रियसनको ब्यानरमा निर्माण भएको फिल्मको प्रस्तुतकर्ता ऋचा घिमिरे हुन् भने निर्माता अनिल पाण्डे र शिवराज कार्की हुन् । प्रिन्स युवराज कार्की र श्रुती दाहाल कार्यकारी निर्माताको भूमिकामा छन् ।
Discussion about this post