‘पुर्ण बहादुरको सारंगी’को प्रमोशनल टुर इटहरी र धरानमा सम्पन्न, आज दमक र विराटनगरमा

इटहरी/ यहि कार्तिक १५ गतेबाट सार्वजनिक प्रदर्शनमा आउने फिल्म ‘पुर्ण बहादुरको सारंगी’ को प्रचारप्रसारात्मक साङ्गीतिक कार्यक्रम इटहरी र धरानमा कार्तिक ३ गते शनिबार सम्पन्न भएको छ । यो कार्यक्रम कोशी प्रदेश अन्तर्गत सुनसरीको इटहरीबाट सुरु गरिएको थियो । जसमा यो फिल्मका प्रमुख कलाकारहरू विजय बराल, मुकुन भुषाल र अन्जना बराइली सहित गायक तथा संगीतकार प्रशान्त सिवाकोटी र सारंगी बाधक बिराज गन्दर्भको उपस्थिति रहेको थियो । मन्डला नाटकघरको जुनकिरी ट्रकको स्टेजमा इटहरीको संगीत चोकमा साङ्गीतिक कार्यक्रमसहित फिल्मको प्रचारप्रसार गरियो ।

कार्यक्रमअघि इटहरीको इलाईट सिनेमा र क्विएफएक्स सिनेफ्लेक्स हलमा टिमले भेटघाट गरे । साथै इटहरीमा आयोजना भएको ‘मिस्टर एण्ड मिस लिटिल पुर्बेली आईकन’का बाल प्रतियोगीहरूसँग पनि कलाकारहरूले भेटघाट गरे । दिउँसो २ बजे भनिएको कार्यक्रम ४ बजे मात्र सुरु भएको थियो । प्रचारप्रसार कार्यक्रममा यो फिल्मका गायक प्रशान्त सिवाकोटीले फिल्मका गीतहरू प्रस्तुत गरे भने सारंगी बाधक बिराजले सारंगीमा र्याप प्रस्तुत गरे । यस्तै इटहरीका युवा कलाकारहरूले बुवा र छोराको भावनात्मक नाटक मञ्चन गरे भने गायक सुरेश कार्कीले आफ्नो ‘रेश्मा’ गीत गाएर उपस्थितलाई रमाइलो गराए । फिल्मका कलाकारहरूले फिल्मको ट्रेलरमा रहेका संवादहरू प्रस्तुत भने इटहरीवासीलाई फिल्म हेर्न आग्रह गर्दै कार्यक्रमलाई सेल्फी खिचेर सम्पन्न गरियो ।

यता धरानमा फ्रेन्ड्स सिनेमा हलमा भेटघाटपछि साँझ ७:३० बजेबाट पुर्ण बहादुरको सारंगीको प्रचारप्रसारात्मक कार्यक्रम सुरु भयो । अचानक आएको वर्षाका कारण कार्यक्रम केही समय अवरोध भए पनि वर्षा रोकिएपछि कार्यक्रम सुरु भएको थियो । कार्यक्रममा धरानका कलाकारहरूले बुवा र छोराको साहित्यिक नाटक मञ्चन गरे भने प्रशान्त र बिराजले आ–आफ्ना प्रस्तुति दिए । धरानबासीलाई फिल्मका प्रमुख कलाकार बिजय, मुकुन र अन्जनाले फिल्म हेर्न आग्रह गर्दै गीतमा नाचेर मनोरञ्जन दिलाए ।

यो प्रचारप्रसारात्मक साङ्गीतिक कार्यक्रमको व्यवस्थापन आकाश रावल र ‘हुस क्रीयशन’ टिमले नेपालभर सम्हालिरहेको छ भने इटहरीमा सुवास संकल्प श्रेष्ठ र सरोज श्रेष्ठ, धरानमा सुमित कार्कीले स्थानिय सहयोगीको भूमिका निर्वाह गरेका थिए । कार्यक्रम सञ्चालन मिमिक्री आर्टिस्ट तथा कमेडियन दिनेश काफ्लेले गरेका थिए ।

आज कार्तिक ४ गते यो प्रचारप्रसारात्मक कार्यक्रम दमकको गोर्खा डिपार्टमेन्ट स्टोरको प्राङ्गणमा दिनको १२ बजे र विराटनगरको महेन्द्र चोकमा दिउँसो ३ बजे आयोजना हुँदैछ । फिल्म ‘पुर्ण बहादुरको सारङी’ सेभेन सिज सिनेमा र बासुरी फिल्म्सको संयुक्त ब्यानरमा निर्माण भएको हो । फिल्मको लेखन तथा निर्देशन सरोज पौडेलले गरेका छन् । बिनोद पौडेल र प्याट्रिक सुवेदी निर्माता रहेको यस फिल्मका कार्यकारी निर्माता रमेश चौलागाईं र हरि श्रेष्ठ हुन् । फिल्मले गन्दर्भ समुदायको संघर्ष, परम्परा संरक्षण र सारङी संस्कृतिको प्रवर्धनको कथा प्रस्तुत गरेको छ ।