‘वसन्त’अघि ‘पुर्ण बहादुरको सारङी’ आएपछि प्रकाश सपूत असन्तुष्ट

इटहरी/ गायक तथा अभिनेता प्रकाश सपुतको प्रमुख भुमिका रहेको फिल्म ‘पुर्ण बहादुरको सारङी’ यहि कार्तिक १५ गतेबाट सार्वजनिक प्रदर्शनमा आउदैछ । यता फिल्मको प्रचारप्रसारलाई निर्माण युनिटले तिब्रता दिएको छ । तर, अभिनेता सपूत भने प्रचारप्रसारमा सक्रिय छैनन् । उनले यो फिल्मको प्रचारमा सहयोग नगरेको आरोप खेप्दै आइरहेका छन् । सामाजिक संजालमा फिल्मको बारेमा नलेखेको देखी ट्रेलर सार्वजनिक कार्यक्रममा समेत उपस्थित नहुदासम्मका कुराहरुले उनलाई खेदिरहेको छ । यसैक्रममा उनले मुख खोलेका छन् ।

सामाजिक संजालमा शुक्रवार बेलुका एक लामो स्ट्याटस लेख्दै सपुतले आफ्नो भावनात्मक स्पष्टीकरण दिएका छन् । उनको सो स्ट्याटसलाई हेर्दा सपुतको ब्यानरमा बन्ने फिल्म ‘वसन्त’ भन्दाअघि ‘पुर्ण बहादुरको सारङी’ रिलिज भएका कारण असन्तुष्टि रहेको बुझ्न सकिन्छ । उनको स्ट्याटसमा रहेको ‘खासमा हाम्रो चलचित्र बसन्तका निर्माताहरु, वितरकहरु र सहकार्य गर्ने ब्राण्हरुसंग परदेशी २ पछि बसन्त नै आउनेछ भन्ने शर्तमा सम्झौता गरेका छौ ।’ भन्ने लाईनले पनि उनी वसन्त अघि पुर्ण बहादुरको सारङी प्रदर्शन भएका कारण सन्तुष्ट छैनन् । त्यसैले यो फिल्मको प्रचारप्रसारमा बेवास्ता गरिरहेका छन् ।

उनी थप लेख्दै ‘मैले पुर्ण बहादुरको सारंगिका लागि कुनै शर्त राखेको थिईन । मैले त उहाहरुलाई आफ्नो समस्या राखेको थिए र सोच्ने समय दिएको थिए’ भन्दै सोचेरै सम्झौतामा स्पस्ट लेखिएको पनि खुलाएका छन् । यता चैत्र २२ लाई रिलिज मिति तय गरेको ‘वसन्त’को यतिबेला छायांकन भैरहेको छ । उनले यसैकारण पनि समय मिलाउन गार्हो भैरहेको घुमाउरो जवाफ पनि दिएका छन् । पुर्ण बहादुरको सारङीलाई आफुले मनैदेखी दर्शकसमक्ष लिएर जाने चाहाना भैरहेको अवस्थामा अचानक प्रदर्शन हुने भएपछि आफू सर्प्राईज भएको लेखेका छन् ।

उनले आफुलाई फिल्मको प्रचारप्रसार गर्न नजान्ने कलाकारको रुपमा उक्त स्ट्याटस मार्फत चित्रण गरेका छन् । पुर्ण बहादुरको सारङीमा आफ्नो भुमिकाको हिसाबले पनि भारी अलि कम भएको उनको भनाई छ । सपुतले स्ट्याटसको अन्त्यमा पुर्ण बहादुरको सारङी फिल्मको पात्र ‘कमले जस्तो सामान्य पात्र भएर ‘बा’को सपना बाच्न पाईराखौ’ भन्दै निर्माण टिमप्रती भने पेचिलो प्रहार गरेका छन् । उनले ‘पर्दामा यस्तो सपना, संघर्ष र ईमानको कथा बनाएर बाहिर चाहि अरुको सपना, संघर्ष र ईमानमाथी बेईमानी र बदनामी गर्नेहरुसंग चाहि फेरी जोडिन नपरोस’ भनेका छन् । मर्यादित बन्न आग्रह गर्दै उनले ‘सिर्जना, दर्शकको शुभेच्छा र स्वयं सिर्जनाको दमले चल्छ ! सर्जक, निर्माता वा कलाकारको दम्भ ले होईन।’ भनेका छन् ।

हेर्नुस् उनको पूरा स्ट्याट्स:
पहिलो चलचित्र परदेशी २ लाई मैले करिब ४ वर्ष पर्खिएको थिए । त्यस बिचमा अवसर पाएर पनि मैले अरु कुनै चलचित्र गरिन ! साथै आफुले सोचेको भन्दा अर्कै समयमा चलचित्र रिलिज हुने भएर पनि मैले आफ्नो व्यवसायिक संगित करियरको एउटा मोडलाई चटक्कै छोडेर चलचित्रलाई मनै देखि दर्शकहरु सम्म लिएर गए र दर्शक को माया पनि पाईयो । मलाई मेरो पेशाको प्रकृति र कर्तव्य थाहा छ । मैले त राम्रा कथाहरु डिटेलमा भन्न पाईयोस भनेर चलचित्र कर्म रोजेको हो । नत्र नेपाली दर्शक स्रोता बाट यो जुनिलाई पुग्ने माया, शुभेच्छा र आशिर्वाद मैले संगित मार्फत पाईरहेको छु । हिरो बन्ने रहर पनि परदेशी २ बाट पुरा भई नै हाल्यो । खासमा हाम्रो चलचित्र बसन्त का निर्माताहरु, वितरकहरु र सहकार्य गर्ने ब्राण्हरु संग परदेशी २ पछि बसन्त नै आउनेछ भन्ने शर्तमा सम्झौता गरेका छौ । यो बिचमा थुप्रै निर्माता निर्देशकहरुहरुले आफ्नो चलचित्रमा काम गराउन चाहानु भएको छ तर मैले ‘मलाई केहि समय चाहिन्छ है ‘ भने पछि केहि ले प्रोजेक्ट होल्ड गरेर पर्खिरहनु भएको छ । केहि ले ‘ल फेरी गरौला ‘ भनेर अरु विकल्प सोचिसक्नु भएको छ । म यतिखेर उहाहरु सबै संग लज्जित छु । किनकि टिम वर्कमा एउटा मान्छे बैमानीमा पर्दा उ संग जोडिएका अरु थुप्रै मानीसहरुलाई धोका हुन्छ । मैले पुर्ण बहादुरको सारंगिका लागि कुनै शर्त राखेको थिईन । मैले त उहाहरुलाई आफ्नो समस्या राखेको थिए र सोच्ने समय दिएको थिए । सोचेरै सम्झौतामा स्पस्ट लेखिएको पनि छ !

जेहोस, पुर्ण बहादुरको सांरगि राम्रो कथामा बनेको छ । मैले राम्रो भएर नै मनै देखि काम गरेको हु । बिजय बराल, मुकुन भुषाल जस्ता जिवन्त कलाकार संग काम गर्न मनै देखि ख़ुशी थिए र मनै देखि दर्शक सम्म लिएर जाने रहर थियो । तर चलचित्र अचानक प्रदशन हुने भय पछि म सरप्राइज़ भए । म संग लड़ि बस्ने ईनर्जि भएन । मैले केहि भन्न सकिन । यतिखेर म बसन्तको छायांकनमा छु । यसको सम्पुर्ण ज़िम्मेवारी आफ्नै काधमा भएकोले समय मिलाउन अलि गार्हो भएको छ र मानसिक रुपमा पनि अरु सोच्न सकिने अवस्था छैन । यसै पनि म उति सारो प्रचार प्रसार गर्न जान्ने र जागर गर्ने कलाकार पनि होईन । भुमिका का हिसाबले पनि सारंगिमा मेरो भारी अलि कम छ जति अरुको छ ।
खैर, मान्छेहरुको व्यवहार जस्तो भए पनि आफ्नो कामको माया लाग्छ । कार्तिक १५ मा रिलिज हुने भए पछि अब यो चलचित्र शर्त र सम्झौताहरु बाट बाहिर निस्केर हामी सबैको भयो । अझै बढि दर्शकहरुको भयो । तपाईहरुको भयो । म यो कथा र आफ्नो पात्र “ कमले” लाई लिएर एकदमै उत्साहित छु र कामना गर्छु , पुर्ण बहादुरको सारंगी जस्तो कथाहरु संग जोडिन पाईराखौ । कमले जस्तो सामान्य पात्र भएर ‘बा’ को सपना बाच्न पाईराखौ । तर पर्दामा यस्तो सपना, संघर्ष र ईमान को कथा बनाएर बाहिर चाहि अरुको सपना, संघर्ष र ईमान माथी बेईमानी र बदनामी गर्नेहरु संग चाहि फेरी जोडिन नपरोस । कम्तिमा मर्यादित बनौ । अर्को कुरा सिर्जना , दर्शकको शुभेच्छा र स्वयं सिर्जनाको दम ले चल्छ ! सर्जक, निर्माता वा कलाकारको दम्भ ले होईन । म यो कुरामा सधै स्पस्ट छु ।
अन्तमा, यो नै अन्तिम स्पस्टिकरण हो है । अब सार्वजनिक रुपमा शर्त, सम्झौता र नकरात्मकताको कुरा गरिने छैन । अब सकरात्मक ढंगले पुर्ण बहादुरको सांरगि को प्रमोशन गरिनेछ ! सबैको मनमा मिठो धुन बजाईनेछ । है त 🙏😍🇳🇵

भेटौला “पुर्णेको छोरा कमले” संग कार्तिक १५ गते !