इटहरी/ प्रदिप खड्का, राज बल्लभ कोइराला, आना शर्मा र दिव्या रायमाझीको प्रमुख भूमिका रहेको फिल्म ‘एक्टर: टेक वन’ को प्रदर्शन मिति फेरबदल गरिएको छ । अदृत फिल्मस् र मोती फिल्मस् द्वारा संयुक्त रूपमा निर्माण गरिएको यस चलचित्रलाई कार्तिक १५ (अक्टोबर ३१, २०२४) मा प्रदर्शन गर्ने योजना भएपनि मानवीय र प्राविधिक कारणले उक्त मिति पर सारिएको हो ।
अब यो फिल्म माघ १६, २०८१, बुधवारका दिन प्रदर्शन गरिने घोषणा निर्माण पक्षले गरेको छ । फिल्म निर्माण युनिटका सदस्यहरूको स्वास्थ्यमा समस्या देखिनुका साथै केही प्राविधिक कठिनाइहरूका कारण प्रदर्शन मिति पर सार्नु परेको जनाइएको छ । फिल्मको उत्कृष्टता र दर्शकहरूको सन्तुष्टिलाई ध्यानमा राख्दै यी समस्या समाधान गर्ने र परिष्कृत रूपमा फिल्मलाई दर्शकमाझ ल्याउने उद्देश्यले नयाँ मिति तय गरिएको हो ।
निर्माण पक्षले यो निर्णयले वितरक, चलचित्र प्रेमी दर्शकहरू र अन्य सरोकारवालाहरूलाई असुविधा पुगेकोमा क्षमा माग्दै, नेपाली चलचित्रलाई निरन्तर माया गर्ने दर्शकहरूलाई समर्थन र धैर्यता देखाउन आग्रह गरेको छ । स्टार कास्ट, टिजर, गीत र पोस्टरका कारण यो फिल्मको चर्चा व्यापक छ । निर्माता थमन कुमार भण्डारी (अदृत फिल्मस्) र मोती कार्की (मोती फिल्मस्) ले जय ‘एक्टर: टेक वन’ र जय नेपाली सिनेमा भन्दै चलचित्र प्रेमी दर्शकहरूलाई धन्यवाद व्यक्त गरेका छन् ।
Discussion about this post