बढ्दै ‘ज्वाइँ साब’को क्रेज, कोशी प्रदेशमा भने ज्वाइँ साब वितरककै हलमा विजोग शो

इटहरी/ फिल्म ‘ज्वाइँ साब’ले फुलपातीको दिन अर्थात् असोज २४ गते बिहीबार रिलिज भएपछि अन्य २ फिल्मसंग प्रतिष्पर्धा गर्न सकस परेपनी यतिबेला भने दर्शकको राम्रो साथ पाउँदै व्यापार गरिरहेको छ । अन्य दुई फिल्महरू ‘छक्का पन्जा ५’ र ‘१२ गाउँ’ भन्दा कम शो पाए पनि ‘वर्ड अफ माउथ’को माध्यमबाट फिल्मप्रति दर्शकको चासो बढ्दै गएको फिल्म निर्माण युनिटले जानकारी गराएको छ ।

तर, बिडम्बना के छ भने कोशी प्रदेशका प्रायः प्रमुख मल्टिप्लेक्स तथा सिंगल थिएटरका हलहरुले ‘ज्वाइँ साब’लाई उतारिसकेका छन् । कोशी प्रदेशको मल्टिप्लेक्सको कुरा गर्ने हो भने यो फिल्म दमकको डिम्याक्स सिनेमा हल र इटहरीको इलाईट सिनेमा हलमा मात्रै लागीरहेको छ । त्यसमा पनि १/१ शो छुट्याईएको छ । अन्य हलले फिल्मलाई उतार्नु र यी हलहरुले मात्रै लगाईराख्नुमा ज्वाइँ साब बितरक एफडी कम्पनीका संचालककै हल भएको कारण हो भन्दा फरक पर्दैन ।

यी हलहरुले पनि ज्वाइँ साबको शोलाई घटाउदै लगिरहेको छ । वितरकको सिनेमा हलमै शो पर्याप्त दिइएको छैन भने अन्य हलले उतार्नु नौलो कुरा रहेन । तर, छक्का पन्जा ५ र १२ गाउँ हेरिसकेका दर्शकले नेपाली फिल्मको विकल्पमा ‘ज्वाइँ साब’को खोजी भएमा कोशी प्रदेशमा पनि पुनः ज्वाइँ साब फर्किने सम्भावना भने देखिन्छ । फिल्म हेरेका अधिकांश दर्शकले मुख्य कलाकार जितु नेपालको अभिनयको तारिफ गरेका छन् ।

निर्माण पक्षले दर्शकहरूलाई फिल्ममा देखाइएको हास्यसंगै भावुक दृश्यले पनि आकर्षित गर्न सफल भएको बताएको छ । फिल्ममा जितु नेपालसँगै निती शाह, बुद्धि तामाङ, हिमेश पन्त, रमेश बुढाथोकी, निमा पाण्डे, शिशिर वाङ्देल, कविता आले, दीपक आचार्य, राजकुमार पण्डित, कमलमणी नेपाल र प्रकाश घिमिरे लगायतका कलाकारहरूको अभिनय देख्न सकिन्छ। फिल्मको प्रस्तुतकर्ता राजकुमार पण्डित हुन् ।