‘रुकुम मैकोट’को रेकर्ड: ४८ दिनको अवधीमा ३ करोडबढी भ्युज

इटहरी/ नेपाली फिल्म ‘खुस्मा’मा समावेश ‘रुकुम मैकोट’ गीतको भिडियोले भ्युजमा ऎतिहासिक रेकर्ड कायम गरेको छ । ४८ दिनमा यो गीतले ३ करोड भन्दा बढी भ्यूज बटुलेको छ । लामो समयसम्म यो गीतको भिडियोले युट्युब ट्रेन्डिङको पहिलो कब्जा गर्न सफल भएको थियो भने हालसम्म पनि युट्युबको ग्लोबल म्युजिक ट्रेन्डिङको ५९औं स्थानमा समेत रहन सफल भएको छ । रुकुम मैकोट गीतको भिडियोले यति छोटो समय अर्थात ४८ दिनमै ३ करोड भ्युज पुगेको रेकर्ड कायम गरेको हो ।

यसअघि यो अवधिमा अन्य कुनै नेपाली गीतको भिडियोले युट्युबमा यस्तो रेकर्ड बनाएको थिएन । यो गीतले नेपाली संगीत बजारमा मात्र होइन, अन्तर्राष्ट्रिय स्तरमा समेत चर्चा पाएको छ । त्यसको उदाहरण युट्युब ग्लोबल ट्रेन्डिङमा विराजमान हुनु हो । यो गीतमा सुरेन्द्र रानाको शब्द, शान्ति श्री परियार र एस.डी. योगीको स्वर रहेको छ । हेर्नुस् गीतको भिडियो ।

असोज ३ गतेदेखी सार्वजनिक प्रदर्शनमा आएको फिल्म खुस्मा अहिले पनि देशभरका धेरै सिनेमा हलमा प्रदर्शनरत छ । धीरज मगर र उपासना सिंह ठकुरी लगायत फिल्मका प्रमुख कलाकारहरूको अभिनय रहेको यस गीतमा संगीत एस.डी. योगीले दिएका हुन् । माओवादी द्वन्दकालको बेला अंकुराएको एक त्रिकोणात्मक प्रेमकथामा आधारित फिल्म खुस्मामा मुख्य पात्रहरू उपासना सिंह ठकुरी ‘खुस्मा’, धिरज मगर ‘गेमी’ र अस्तित्व भट्टचन ‘माने’ बीचको गहिरो प्रेम र समर्पणलाई प्रस्तुत गरिएको छ ।

यो फिल्म खुस्मामा निर्देशक अशोक थापा मगरको कथा तथा निर्देशन रहेको छ । एम मिडियाको ब्यानरमा निर्माण भएको फिल्ममा वीर बहादुर लामा, चन्द्र भट्टचन, बेताने मगर र मान बहादुर धनाह मगर निर्माता रहेका छन् भने सुस्मिता बुढाथोकी सहनिर्माताको रुपमा रहेका छन् । फिल्ममा आइतेको भुमिका निर्वाह गर्ने राजु रेग्मी मगर लाईन प्रोड्युसर हुन् ।