इटहरी/ नेपाली फिल्म उद्योगमा निकै प्रतीक्षित मानिएको फिल्म ‘छक्कापञ्जा ५’ को ट्रेलर आइतवार सार्वजनिक भएको छ । अभिनेत्री समेत रहेकी दीपाश्री निरौलाको निर्देशनमा बनेको यो फिल्म दशैंको अवसरमा असोज २४ गते बिहीबार फुलपातीको दिनदेखि सार्वजनिक प्रदर्शनमा आउदैछ । यो फिल्मको ट्रेलरलाई निकैले प्रतीक्षा गरिरहेका थिए । अन्ततः ट्रेलर सार्वजनिक पश्चात् प्रतिक्रियाहरु पाउन थालेको छ ।
युट्युबमा ट्रेलर सार्वजनिक गर्ने विषेश अवसर जुराईएको थियो । दिपक-दिपा क्याम्पलाई ६ फाप्ने भएकोले आइतबार साँझ ६:५५ को समयमा ट्रेलर सार्वजनिक गरिएको हो । फिल्ममा दीपकराज गिरी, केदार घिमिरे ‘माग्ने बुढा’ र वर्षा सिवाकोटीको मुख्य भूमिका रहेको छ । यस्तै राजाराम पौडेल, लोकेन्द्र लेखक, ब्रजेश खनाल, रमेश बुढाथोकी र प्रकाश घिमिरेको समेत ‘छक्का पन्जा ५’ मा अभिनय देख्न सकिन्छ । हेर्नुस् ट्रेलर ।
देशमा ब्याप्त भ्रष्टाचार र कर्मचारीतन्त्रलाई कटाक्ष गर्दै मनोरञ्जनको धारमा टेकेर ‘छक्का पन्जा ५’ को कथा बग्ने ट्रेलरबाट बुझिन्छ । राजनितिलाई व्यंग्य गर्ने यो सिरिजको प्रमुख पक्ष रहदै आईरहेको छ । अघिल्ला सिरिजमा झै हास्य खुराकहरु यो सिरिजको सार्वजनिक ट्रेलरमा निकै कम देख्न सकिन्छ । तर, ट्रेलरमा एक्सनका दृष्य, गम्भीर संवाद र जालझेल गरेर विवाह गरेपछिको परिणामलाई प्रमुख प्राथमिकताका साथ अटाईएको छ । दीपकराज गिरीलाई भ्रष्टाचार नगर्ने इमानदार कर्मचारीको भूमिकामा देखाइएको छ । यसर्थ यसपटक छक्का पन्जा ५ ले हसाउने मात्रै हैन, केही गम्भीर विषयबस्तुलाई प्रस्तुत गर्न सक्ने संकेत देखिन्छ ।
यो फिल्म ‘छक्का पन्जा ५’ मा निर्माताको रुपमा केशब न्यौपाने र दिपेन्द्र खनिया छन् भने केदार घिमिरे ‘माग्ने बुढा’ र निर्मल शर्मा कार्यकारी निर्माताको रुपमा रहेका छन् । फिल्मका दुई लोकप्रिय गीत ‘विहे भाको छैन’ र ‘ब्रेकअप गीत’ले विशेष चर्चा बटुलिसकेको छ । यी गीतहरू टिकटक, फेसबुक रिल्स जस्ता सामाजिक सञ्जालमा भाईरल भैसकेका छन् । ८ वर्षअघि देखि सुरु भएको यो श्रृङखलाले अहिलेसम्म बक्स अफिसमा तहल्का पिटिरहेको छ । गएको ४ ओटै श्रृङखलाले करोडौ आम्दानी गरेका थिए भने यो पाँचौ श्रृङखलाले पनि सो क्रमलाई निरन्तरता दिने अड्कल गर्न सकिन्छ ।
पाँचौ श्रृंखला नेपालसहित उत्तर अमेरिका, युरोप, पूर्वी एसिया, अष्ट्रेलिया र न्युजिल्याण्डमा एकसाथ रिलिज हुँदैछ । तर, मध्यपूर्वमा भने नेपाल रिलिजको एक हप्तापछि प्रदर्शनमा आउने निर्माताको भनाई छ । मध्यपूर्वको साउदी अरब, माल्दिभ्स र अमेरिकाको उत्तरी राज्य अलास्कामा नेपाली फिल्म पहिलो पटक प्रदर्शन हुँदैछ, त्यो छक्का पन्जा ५ नै हो । यो फिल्मले नेपाल र विदेशमा आक्रामक ओपनिङ गर्ने प्रक्षेपण गरिएको छ भने अमेरिकामा एड्भान्स बुकिङको ट्रेन्डले यसलाई रेकर्ड ब्रेक गर्ने सम्भावना देखाउछ ।
Discussion about this post