फिल्म ‘मन बिनाको धन ठूलो कि धन बिनाको मन’ निर्माण हुने, अशोक दर्जीको डेब्यु

इटहरी/ गायक तथा संगीतकार टंक बुढाथोकीले आफ्नो हिट गीत ‘मन बिनाको धन ठूलो कि धन बिनाको मन’को नाममा फिल्म बनाउने भएका छन् । आइतबार उनले यस शीर्षकलाई चलचित्र विकास बोर्डमा दर्ता गराएका हुन् । टंकले यस फिल्मको निर्देशन र निर्माण दुवैको जिम्मेवारी सम्हाल्ने छन् भने लक्ष्मी गिरि कार्यकारी निर्माताको रुपमा रहनेछिन् ।

यसको सह-निर्मातामा बिनय अधिकारी रहने जनाईएको छ । सामाजिक कथामा आधारित यो फिल्मले बाल गायक अशोक दर्जी र एआर बुढाथोकीलाई डेब्यु गराउनेछ । त्यस्तै, नव नायक रमेश बिकले पनि यही फिल्मबाट नेपाली सिनेमा क्षेत्रमा पहिलो पाइला चाल्ने भएका छन् ।

निर्देशक बुढाथोकीले बिकलाई फिल्ममा अनुबन्धित गरिसकेको जानकारी दिएका छन् । फिल्मको कथा टंक बुढाथोकी स्वयंले लेखेका हुन् भने पटकथा तथा संवाद शिवम अधिकारीले तयार पारेका छन् । तिहारपछि छायांकन सुरु हुने यस फिल्मका अन्य कलाकारहरूको छनोट केही दिन भित्रै हुने बताईएको छ ।