प्राकृतिक विपत्तिका कारण प्रदर्शनरत फिल्म ‘सानो संसार’को प्रदर्शन स्थगित

इटहरी/ हाल प्रदर्शनरत फिल्म ‘सानो संसार’को प्रदर्शन हालैको प्राकृतिक विपत्तिका कारण स्थगित गरिएको छ । असोज ११ गतेदेखि देशभर प्रदर्शनमा आएको यो फिल्मलाई हाल निरन्तर वर्षाका कारण आएको बाढीपहिरो र अन्य प्राकृतिक विपत्तिहरूले पारेको असरका कारण स्थगित गरिएको निर्माण टिमले एक बिज्ञप्ति जारी गर्दै जनाएको छ ।

निर्माता अर्जुन कुमार र वितरक माधव वाग्लेका अनुसार जनजीवनलाई प्रभावित पार्ने यस्ता विपत्तिहरूले गर्दा दर्शकहरूलाई हलसम्म ल्याउन कठिन हुने ठहर छ । जसले गर्दा फिल्मको प्रदर्शन केही समयका लागि स्थगित गरिएको हो । बिज्ञप्तिमा भनिएको छ, “पहिलो प्राथमिकता जनताको सुरक्षालाई दिनुपर्ने भएकाले, अहिलेको कठिन समयमा फिल्म प्रदर्शन गर्नु उचित हुँदैन ।”

निर्माण टोलीले आगामी दिनमा उपयुक्त समय तथा वातावरण मिल्नासाथ फिल्म प्रदर्शनको नयाँ मिति घोषणा गरिने जानकारी दिएको छ । दर्शकहरूको निरन्तर समर्थन र माया प्रति आभार प्रकट गर्दै, फिल्म ‘सानो संसार’ चाँडै नै ठूलो उत्साहका साथ प्रस्तुत गरिने वाचा सार्वजनिक बिज्ञप्तिमा गरिएको छ ।