नाजिर हुसेन ट्रान्सवुमनको भूमिकामा रहेको फिल्म ‘गुन्यो चोलो प्रदर्शन मिति स्थगित

इटहरी/ फिल्म ‘गुन्यो चोलो’को प्रदर्शन मिति हाललाई स्थगित गरिएको छ । निर्देशक समुन्द्र भट्टले यसअघि कार्तिक ९ गतेलाई तय गरिएको प्रदर्शन मिति स्थगित गरिएको जानकारी बिहीबार सामाजिक सञ्जालमार्फत सार्वजनिक गरेकी हुन् । भट्टका अनुसार केही विशेष कारणले फिल्म तत्कालका लागि रिलिज गर्न नसकिए पनि चाँडै नै नयाँ मिति घोषणा गरिनेछ । उनले ठूलो खबरसँगै फिल्म प्रदर्शनबारे थप जानकारी सार्वजनिक गर्ने बताएकी छिन् ।

यो फिल्ममा अभिनेता नाजिर हुसेनले पहिलो पटक ट्रान्सवुमनको भूमिकामा अभिनय गरेका छन् । फिल्ममा उनको ट्रान्सवुमन लुक्सले चर्चा बटुलेको थियो । जसका लागि उनले १५ केजी तौल घटाएका थिए । अमेरिकी कम्पनी भिजन इन्टरटेन्मेन्ट र दि स्काई ओसन इन्टरटेन्मेन्टको सहकार्यमा बनेको यो फिल्ममा नाजिरसँगै सञ्चिता लुइँटेल, विशाल पहारी, सुशील सिटौला, अनुपम श्रेष्ठ, निशा बजगाईं लगायतका कलाकारको अभिनय छ ।

फिल्मको पटकथा र संवाद निर्देशक भट्ट र अभिनेता हुसेनले मिलेर लेखेका हुन् भने पोस्ट प्रोडक्सनको काम विदेशमा सम्पन्न भएको छ । फिल्मको ब्याकग्राउन्ड म्युजिक हलिउडका प्रसिद्ध संगीतकार मार्सेलो दि फ्रान्सिसीले तयार पारेका हुन् । साथै, हलिउडकी गायिका लिजा जेरार्डले सिनेमाको लागि स्वर दिएकी छिन् । फिल्ममा छायाँकारको भूमिका अलोक शुक्लाले निभाएका छन् ।

निर्माण टिममा आकाश बुढाथोकी र भि भन्से जानुबोन निर्माता रहेका छन् भने जेफ्री जे वेन र स्टिभ जोन्स्टन कार्यकारी निर्माताको भूमिकामा छन् । फिल्मका सहयोगी निर्माता अनुपम श्रेष्ठ हुन् । फिल्म ‘गुन्यो चोलो’को गीत लेखु सहयात्रीले लेखेका छन् भने प्रोडक्सन हेड पुष्कर लामा र क्रिएटिभ हेड राम भण्डारी रहेका छन् ।