फिल्म ‘झिल्को’को फर्स्टलुक सहित प्रदर्शन मिति सार्वजनिक

इटहरी/ फिल्म ‘झिल्को: द स्पार्क’ को फर्स्टलुक सार्वजनिक गरिएको छ, जसको निर्देशन ‘झोला’ फेम्ड यादवकुमार भट्टराईले गरेका छन् । शुक्रबार सार्वजनिक गरिएको पोस्टरमार्फत निर्देशक भट्टराईले यो फिल्म पुस ५ गतेदेखि नेपालभर प्रदर्शनमा आउने जानकारी दिए । पोस्टरमा प्रमुख कलाकार सुनिल पोखरेल, वर्षा सिवाकोटी, भोलाराज सापकोटा, विशाल पोखरेल र आयुषी ढकाललाई देख्न सकिन्छ ।

फिल्मले मोबाइलको दुव्र्यसनले बालबालिकामा पर्ने असर र त्यसको कारणले परिवार र समाजमा देखिने समस्यालाई उजागर गर्ने संकेत दिएको छ । निर्देशक भट्टराईले विज्ञप्तिमा भनेका छन्, “झोला र भोरपछि हाम्रो तेस्रो चलचित्र झिल्को: द स्पार्क डिजिटल युगमा देखिएको मोबाइल दुव्र्यसनको कथामा आधारित छ। ग्याजेटको प्रयोगले सबै उमेरका मानिसहरूलाई गाँजेको वर्तमान समयलाई सम्बोधन गर्ने प्रयास यस फिल्ममा गरिएको छ।”

भट्टराईले फिल्मलाई ‘सामाजिक व्यवसायिक चलचित्र’को रूपमा प्रस्तुत गर्दै प्रविधिको विवेकपूर्ण प्रयोग गर्नुपर्ने चेतावनी दिएका छन्। उनले भने, “प्रविधि आगो जस्तै हो, ठीकसँग प्रयोग गरे चुल्हो बल्छ, नजाने ठूलो डढेलो हुन्छ।”

फिल्मको निर्माण चुनौतीपूर्ण भएको उनले स्वीकार्दै, “सामाजिक उत्तरदायित्व बोध गर्दै यो फिल्म निर्माण गरेका छौँ।” ‘झिल्को’को पटकथा भट्टराई, अरुणदेव जोशी, र देवव्रतले लेखेका हुन् भने दीपक बज्राचार्यले छायांकन गरेका छन्। संगीतकार चण्डीप्रसाद काफ्ले र दीपक शर्माको संगीत फिल्ममा रहेको छ भने यसमा समावेश गीत आनन्द अधिकारीले लेखेका छन्, जसलाई शिव परियार र निशा देशारले स्वर दिएका छन्।

फिल्मका निर्माता सुशीला आचार्य र रामगोपाल थापा रहेका छन् भने कार्यकारी निर्माता उमेश पौडेल हुन्। ‘झिल्को’मा दिलिप पन्त निर्माण नियन्त्रक, सहसम्पादन नारायण गैरे र मुख्य सहायक छायांकन विवेक लामा रहेका छन् । फिल्मको नेपाल वितरक डीएसएन नेपाल र अमेरिका तथा क्यानडा वितरक इपिक इन्टरटेन्मेन्ट रहेका छन् ।