बाल मनोविज्ञानमा बनेको फिल्म ‘सारंग’को फर्स्टलुक पोस्टर सार्वजनिक

इटहरी/ फिल्म ‘सारंग’को बिहीबार फर्स्टलुक पोस्टर सार्वजनिक गरिएको छ । यो फिल्म बाल मनोविज्ञान, बालअधिकार र धनी–गरिबबीचको खाडलजस्ता विषयमा निर्माण गरिएको छ । कोरियोग्राफरको रुपमा परिचित प्रशान्त तामाङको डेब्यु निर्देशनमा बनेको यस फिल्मको प्रदर्शन मिति पनि घोषणा गरिएको छ । जसअनुसार फिल्म ०७ मंसिरमा देशव्यापी प्रदर्शन हुनेछ ।

सार्वजनिक पोस्टरमा अभिनेत्री ऋचा शर्मा, उत्पल झा, बालकलाकार सम्राट थापा र आदित्य कार्कीलाई प्रस्तुत गरिएको छ । निर्देशक तामाङले नै लेखेको यस फिल्मलाई टि फल्क फिल्मस्ले वितरण गर्नेछ । समीर मणि दीक्षित, सुरज तमु, मणि के राई, अनिषा न्यौपाने, निरज ब्ल्याक, दीपीका थापा, सुमन सागर जंग केसी, बिश्व स्याङ्वो र प्रभातजंगलगायतका कलाकारहरूको समेत अभिनय रहेको छ ।

दर्शन बुद्ध फिल्म्सको ब्यानरमा निर्माण भएको यो फिल्मका छायाँकार गोपाल राय हुन् भने सम्पादन मित्र ध्वज गुरुङले गरेका छन् । डिपी खनालको शब्दमा रहेका गीतहरूको संगीत शंकर थापा ‘स्माइल’ ले दिएका छन् । निर्देशक तामाङले फिल्मले सबै वर्गका दर्शकहरूलाई फरक अनुभूति दिने आशा व्यक्त गरेका छन् ।