युट्युब ट्रेन्डिङमा नेपाली फिल्मको चलपहल: ४ नेपाली फिल्मका ५ कन्टेन्ट

इटहरी/ यतिबेला युट्युब नेपाल ट्रेन्डिङ हेर्ने हो भने नेपाली फिल्ममय बनेको छ । युट्युब ट्रेन्डिङमा नेपाली फिल्मको कन्टेन्टहरुको चहलपहल राम्रै देखिन्छ । यो समाचार तयार गर्दै गर्दा एक पूरा फिल्म सहित ३ नेपाली फिल्मका ५ ओटा प्रचारप्रसार सामग्री अर्थात ट्रेलर तथा गीत युट्युब ट्रेन्डिङको मुभी र म्युजिक क्याटोगरीमा रहेको छ । युट्युब नेपाल ट्रेन्डिङको ३९ औं नम्बरमा फिल्म ‘नाङ्गो गाउँ’ को पूरा फिल्म रहेको छ । २ साताअघि युट्युबमा सार्वजनिक यो फिल्म सार्वजनिक देखी नै युट्युब ट्रेन्डिङ मै रहिरहेको छ ।

ट्रेन्डिङको पहिलो नम्बरमा समेत पुगेको यो फिल्म अझै ट्रेन्डिङ यात्राबाट बाहिरिएको छैन । सर्ट्सहरुले भरिने युट्युब नेपालको ट्रेन्डिङ लामो समयपछि नेपाली फिल्मले ट्रेन्डिङको पहिलो स्थान पकड गरेको हो । गत वर्षको भदौ २९ गते सार्वजनिक प्रदर्शनमा आएको यो फिल्ममा दयाहाङ राई र मिरुना मगर, साम्राज्ञि राज्य लक्ष्मी शाह, कर्मा शाक्य लगायतको अभिनय रहेको छ । व्यापारिक सफलता पाएको यो फिल्मले रिलिजका बेला पनि हलमा ५१ औं दिन मनाउन सफल भएको थियो । फिल्ममा दिपेन्द्र लामाको लेखन तथा निर्देशन रहेको छ भने जय श्रेष्ठले निर्माण गरेका हुन् ।

यस्तै युट्युब ट्रेन्डिङको ‘मुभी’ क्याटोगरी हेर्ने हो भने पनि नेपाली फिल्मकै दब्दबा रहेको देख्न सकिन्छ । मुभी क्याटोगरी अन्तर्गत पहिलो नम्बरमा हाल प्रदर्शनरत फिल्म खुस्माको ट्रेलर रहेको छ भने दोश्रो नम्बरमा यहि असोज १७ गते दशैँको घटस्थापनादेखी प्रदर्शनमा आउने तयारीमा रहेको फिल्म ‘बेहुली फ्रम मेघौली’ ट्रेलर रहेको छ ।

२ साताअघि सार्वजनिक ‘खुस्मा’को ट्रेलरले धेरैदिन देखी मुभी क्याटोगरीमा पहिलो नम्बर कब्जा गरेर बसेको छ । १० लाख भ्युजको नजिक पुगेको यो फिल्म हलमा यतिबेला सफलतापुर्वक प्रदर्शनको दोश्रो सातामा प्रवेश गरेको छ । धिरज मगर, उपासना सिंह ठकुरी लगायतको अभिनय रहेको यो फिल्मलाई अशोक थापा मगरको कथा तथा निर्देशनमा तयार गरिएको हो । फिल्मलाई वीर बहादुर लामा, चन्द्र भट्टचन, बेताने मगर र मान बहादुर धनाह मगरले संयुक्त निर्माण गरेका हुन् ।

यता ६ दिनअघि युट्युबमा सार्वजनिक गरिएको फिल्म ‘बेहुली फ्रम मेघौली’को ट्रेलरले युट्युब ट्रेन्डिङको मुभी क्याटोगरीको दोश्रो स्थान कब्जा गर्दै ११ लाख बढी भ्युज बटुल्न सफल भएको छ । यो फिल्मको प्रचारप्रसार कन्टेन्ट पोस्टर, टिजर, गीतहरु र ट्रेलरसम्म आइपुग्दा प्रतिक्षित बन्न पुगेको छ । फिल्मका गीतहरुले अत्याधिक चर्चा बटुल्न सफल भएको छ । यो फिल्ममा स्वस्तिमा खड्का, निस्चल बस्नेत, बसुन्धरा भुषाल, विजय बराल, रक्षा थापा, लोकेन्द्र लेखक लगायत कलाकारहरूको अभिनय रहेको छ ।

सजन काफ्ले र आकाश बरालको लेखन तथा निर्देशन रहेको ‘बेहुली फ्रम मेघौली’लाई स्वस्तिमा खड्का र निश्चल बस्नेतले निर्माण गरेका हुन् । यो फिल्मको २ महिनाअघि सार्वजनिक ‘उडायो मन’बोलको गीतलाई ४५ लाख, १ महिनाअघि सार्वजनिक ‘छड्के सलाम’बोलको गीतलाई ५५ लाख, २ महिनाअघि सार्वजनिक ‘बिहे गर्नेकी नगर्ने’ बोलको गीतलाई १० लाख र १ महिनाअघि सार्वजनिक टिजरलाई १३ लाख बढी भ्युज प्राप्त भएको छ ।

यस्तै युट्युब नेपाल ट्रेन्डिङ अन्तर्गत नै ‘म्युजिक’ क्याटोगरी हेर्ने हो भने पनि नेपाली फिल्मको प्रचारप्रसार सामग्री देखिन्छन् । यस अन्तर्गत पहिलो नम्बरमा खुस्मा फिल्मको ‘रुकुम मैकोट’ गीतको भिडियोले कब्जा जमाएको छ भने मुभी क्याटोगरीको सातौं नम्बरमा फिल्म १२ गाउँको ‘सिनेमा हेर्न जाँउ’ बोलको गीतको भिडियो रहेको छ । त्यस्तै केही तल ट्रेन्डिङको १५ औं नम्बरमा फिल्म १२ गाउँ कै २ दिनअघि सार्वजनिक ‘कसो कसो’बोलको गीतको भिडियो रहेको छ ।

यतिबेला सिनेमा हलमा सफलतापुर्बक दोश्रो सातामा प्रदर्शन भैरहेको फिल्म ‘खुस्मा’को रुकुम मैकोट गीत सफलताको चरम चुलीमा छ । खुस्मा फिल्म हाउसफुलका साथ चल्नुमा केहिले यो गीतको सफलता नै प्रमुख कारण मानिरहेका छन् । हुन पनि सामाजिक संजाल टिकटक, इन्स्टाग्राम, फेसबुकदेखी युट्युबसम्म यो गीतको लोकप्रियता उच्च छ । हरेकको मुखमुखमा झुण्डिएको छ यो गीत । सार्वजनिक कार्यक्रमदेखी अब दशैँ तिहारका सार्वजनिक तथा पारिवारिक कार्यक्रममा पनि यो गीतले धुम मच्चाउने आंकलन गर्न सकिन्छ । यो गीत रुकुम मैकोटले १ करोड ६५ लाख बढी भ्युज पाउँदै मुभी क्याटोगरिको ट्रेन्डिङ १ कब्जा जमाएको धेरै दिन भैसक्यो ।

यता चर्चामा रहेको अर्को फिल्म हो ‘१२ गाउँ’ । यो फिल्मको दशैँमा ‘छक्का पन्जा ५’ र ‘ज्वाइँ साब’संग प्रतिष्पर्धा हुँदैछ । असोज २४ गते अर्थात दशैँको फुलपातीको दिनबाट यो फिल्म प्रदर्शनमा आउदैँछ । सामाजिक संजाल र युट्युबमा प्रतिक्रिया हेर्ने हो भने यो फिल्मले दशैँमा बाजी मार्ने पक्का छ । तर, सामाजिक संजालको जमात र सिनेमा हलमा फिल्म हेर्न जाने जमात अलग अलग छन् । यो भन्दै गर्दा बिराज भट्टको क्रेज र यहि फिल्मबाट डेब्यु गर्न लागेका उनका छोरा समीर भट्टको चर्चासंगै फिल्मको टिजर र सार्वजनिक गीतहरुले हलमा दर्शकको माहौल नजम्ला भन्न सकिन्न । यो फिल्मको सार्वजनिक २ ओटै गीत यतिबेला युट्युब ट्रेन्डिङको ‘म्युजिक’ क्याटोगरीमा बिराजमान छ । फिल्मको पहिलो गीत ‘सिनेमा हेर्न जाँउ’ले राम्रो चर्चा बटुलिसकेको छ । २ साताअघि युट्युबमा सार्वजनिक यो गीतको भिडियोले १४ लाखबढी भ्युज बटुलिसकेको छ भने हालै सार्वजनिक ‘कसो कसो’ गीतको भिडियोको पनि चर्चा चुलिदै छ । यो फिल्म ‘१२ गाउँ’लाई बिराज भट्टले निर्देशन गरेका छन् । फिल्मको कथा सन्तोष सरकारको हो भने १२ गाउँको निर्मातामा सरस्वती भट्ट रहेकी छन् ।