इटहरी/ फिल्म ‘फिरफिरे फिरिरी’को फर्स्टलुक पोस्टर सार्वजनिक गरिएको छ । हरर कमेडी जनरामा बनेको यो फिल्म बिन्दबासिनी क्रियसनको ब्यानरमा निर्माण गरिएको हो । करिब १५ वर्षपछि फिल्म निर्माणमा फर्किएका निर्माता मनोज कुमार अधिकारीले यसअघि ‘नौ डाँडा पारी’ र ‘मंगलसुत्र’ जस्ता फिल्म निर्माण गरेका थिए । अधिकारीले अब निरन्तर फिल्म निर्माणको योजना बनाएको बताएका छन् ।
सन्दिप श्रेष्ठ र नबिन भट्टको लेखनमा आधारित यस फिल्मले दर्शकलाई पूर्ण मनोरञ्जन दिने विश्वास निर्माण टिमले लिएको छ । यसै फिल्मबाट सन्दिप श्रेष्ठ र भावना उप्रेतीले नेपाली फिल्म क्षेत्रमा डेब्यु गर्दैछन् । फिल्मको निर्देशन नबिन भट्टले गरेका हुन् । फर्स्टलुक पोस्टरमा चारजना मुख्य पात्र देख्न सकिन्छ, जहाँ स्कुटीमा बसेकी एक युवतीलाई तीनजना युवाले तानातान गरिरहेका छन् ।
पोस्टरसँगै फिल्मको प्रदर्शन मिति पनि घोषणा गरिएको छ, जसअनुसार ‘फिरफिरे फिरिरी’ आगामी कार्तिक २२ गते छठ पर्वको अवसरमा प्रदर्शन हुनेछ । अनन्त घिमिरेले डिजाइन गरेको पोस्टरमा फिल्मको नाम पहेलो रंगमा हाईलाइट गरिएको छ, जहाँ स्लोगनमा “आज साईकल…भोली फरारी” लेखिएको छ । फिल्ममा मनोज कुमार अधिकारी, सन्दिप श्रेष्ठ, भावना उप्रेती, शंकर सेढाई, पिटर प्रिन्स, रबिना केसी, पुष्प अवस्थी, र सूर्यमान लिम्बु लगायतका कलाकारको अभिनय रहेको छ ।
फिल्मको छायांकन जितु तामाङले गरेका छन् भने सहायक निर्देशनमा रोशन दास, प्रकाश दाहाल र अग्नि सुबेदी छन् । केशव राज भट्टले कोरियोग्राफी गरेको यस फिल्ममा एलिस कार्कीको ब्याकग्राउन्ड म्युजिक, प्रशान्त सिवाकोटीको संगीत, अमित श्रेष्ठको साउण्ड डिजाइन र अनन्त घिमिरेको सम्पादन तथा कलर संयोजन रहेको छ । फिल्मलाई देशभर आर.आर. फिल्म्सले वितरण गर्नेछ भने डिजिटल अधिकार म्युजिक नेपालले लिएको छ ।
Discussion about this post