इटहरी/ अभिनेता पल शाह निकालिएपछी फिल्म ‘कल्ली’मा एकपछी अर्का कलाकारहरू अनुबन्ध भैरहेका छन् । अभिनेता शाहको ठाउँमा सौगात मल्ललाई केहि दिनअघि अनुबन्ध गरिएको थियो भने अहिले फिल्ममा अर्पण थापा, बुद्धि तामाङ र कमलमणि नेपाल अनुबन्धित भएका छन् । फिल्म ‘रावायण’मा पल शाहको फितलो उपस्थिति र विगतको घटनाले फिल्मलाई पारेको असरका कारण ‘कल्ली’ निर्माण युनिट सजग हुँदै अभिनेता शाहलाई निकालिएको चर्चा फिल्मी बजारमा चलिरहेको छ ।
यो फिल्मका लागी शाहको क्यारेक्टर लुक्स सहित २ पोस्टर पनि यसअघि नै सार्वजनिक गरिएको थियो । तर, फिल्ममा पल भएका कारण प्रस्ताव गरिएका अन्य कलाकारहरूले फिल्म खेल्न अस्विकार गरेको समेत चर्चा चलेको छ । रेड बर्ड प्रोडक्शन र कस्तुरी प्रोडक्शनको सहकार्यमा निर्माण हुन लागेको यो फिल्म ‘कल्ली’को अन्य तीन मुख्य पात्रको भूमिकाबारे निर्माण पक्षले हालसम्म केही खुलाएको छैन । निर्माता किरण नेपालीको प्रस्तुति रहने यो फिल्ममा लक्ष्मण सुनारले कथा तथा निर्देशनको जिम्मेवारी लिएका छन् ।
लक्ष्मणले यसअघि ‘बुलाकी’ निर्देशन गरेका थिए । फिल्मको पटकथा र संवाद महेश दवाडीले लेखेका छन् भने सुरज आचार्य निर्माण प्रमुखको भूमिकामा रहेका छन् । यो फिल्मलाई आगामी नयाँ वर्ष २०८२ को अवसर पारेर चैत्र २९ गते प्रदर्शन गर्ने तयारी गरिएको छ । फिल्मको पोस्टर राकेश दाहालले तयार पारेका हुन् भने कर्णाली प्रदेशका विभिन्न रमणीय स्थानहरूमा छायांकन हुने निर्देशक सुनारले जानकारी दिएका छन् । कल्लीको तिहारपछि छायांकन सुरु हुने योजना बनाइएको छ ।
Discussion about this post