इटहरी/ फिल्म ‘खुस्मा’ संविधान दिवसको अवसर पारेर असोज ३ गतेदेखि प्रदर्शनमा आउने तयारीमा छ । फिल्म प्रचारप्रसारका लागि मुख्य कलाकार धिरज मगर र उपासना सिंह ठकुरी यतिबेला निकै व्यस्त छन् । शनिबार मात्र धिरज ‘नेपाल मगर सांस्कृतिक संघ’ विशेष उपत्यका समितिले आयोजना गरेको खुल्ला मौलिक कौराह (कानराहा) नृत्य प्रतियोगितामा सहभागी भएका थिए । उक्त कार्यक्रमका प्रमुख अतिथि पूर्व उपराष्ट्रपति नन्द किशोर पुन थिए ।
कार्यक्रममा मगरले जनयुद्धको परिवेशमा मगर संस्कार र संस्कृति समेटेर निर्माण गरिएको ‘खुस्मा’ फिल्म हेर्न सबैलाई निम्तो दिए । उनले आफ्नो अघिल्लो फिल्म ‘बाबरी’को समयमा दर्शकबाट पाएको समर्थन सम्झदै यसपटक पनि त्यस्तै साथ र सहयोगको अपेक्षा रहेको बताए । धिरजले कार्यक्रममा ‘रुकुम मैकोट’ बोलको गीतमा नृत्य प्रस्तुत गरेका थिए, जुन दर्शकले निकै रुचाए । प्रमुख अतिथि पुनले अभिनेता मगरलाई मगर सांस्कृतिक संघको लोगो अंकित पगरी लगाइदिँदै आगामी फिल्मको सफलताको शुभकामना दिए ।
पुनले पनि मगर संस्कृतिलाई पर्दामा ल्याउन धिरजले गरेको प्रयासको प्रशंसा गर्दै, समय मिलाएर ‘खुस्मा’ हेर्ने प्रतिज्ञा गरे। फिल्मको निर्देशन अशोक थापा मगरले गरेका हुन् । थापाले यसअघि केही डकुमेन्ट्री सिनेमा निर्देशन गरेका भएपनि ठूलो पर्दाको यो उनको पहिलो फिल्म हो । विभिन्न अन्तर्राष्ट्रिय महोत्सवबाट नौवटा पुरस्कार जितेका थापा मगर यो फिल्ममा मगर संस्कृतिको गहिराइलाई उजागर गर्न चाहन्छन् ।
एम मिडिया प्रालिको ब्यानरमा निर्माण भएको यस फिल्मका निर्माता विर बहादुर लामा, चन्द्र बहादुर भट्टचन, मान बहादुर धनाह मगर र बेतान मगर हुन् । सह-निर्मातामा सुस्मिता बुढाथोकी छन् । दिपक बज्राचार्यको छायांकन रहेको फिल्मले यसअघि रिलिज भएका गीत र ट्रेलरले राम्रो चर्चा पाएको छ । ट्रेन्डिङको शीर्ष स्थानमा रहेका यी सामग्रीले दर्शकको उच्च उत्साह देखाएका छन् ।
फिल्ममा धिरज र उपासनासँगै माओत्से गुरुङ, खड्ग बहादुर पुन (खबपु), सुजाता राई, विजय सुब्बा, राज थापा काउचा लगायतका कलाकारको अभिनय छ । जनयुद्धको पृष्ठभूमिमा निर्माण भएको प्रेमकथामा आधारित यो फिल्मले युद्धको बीचमा अंकुरिएको प्रेमलाई पर्दामा उतार्नेछ । संगीत एसडी योगी र कोरियाली संगीतकार छान्जु पार्कले दिएका छन् भने फिल्मको वितरण काफिया फिल्म्सका गोविन्द शाहीले गर्नेछन् ।
Discussion about this post