इटहरी/ फिल्म ‘तेल भिसा’ को दोस्रो गीत ‘तुकुनको मुकुन मन पर्या’ सार्वजनिक भएको छ । बिहीबार युट्युबमा सार्वजनिक भएको यस गीतमा मुख्य कलाकार विपिन कार्की, पूजा चन्द, बुद्धि तामाङ र जाहन्वी बस्नेतको आकर्षक अभिनय देख्न पाइन्छ । यो फिल्म मंसिर ७ गतेबाट प्रदर्शनमा आउने तयारीमा छ ।
सार्वजनिक यस गीतमा कृष्ण भारद्धाजको संगीत रहेको छ भने राजन इशानले एरेञ्ज गरेका छन् । शब्द सिर्जना निर्विकल्पम, कृष्ण भारद्धाज, शंकर अधिकारी घायल र नवीन बिकले गरेका हुन् । शान्तिश्री परियार र साइराज खत्रीको आवाजले गीतलाई उत्कृष्ट बनाएको छ, जसले गीतको अडियो र भिडियोलाई प्रभावकारी बनाएको छ । हेर्नुस् गीत ।
शंकर घिमिरेद्वारा लेखन र निर्देशन गरिएको ‘तेल भिसा’ मा विपिन कार्कीलाई बृद्ध र युवा दुवै अवतारमा देख्न पाइन्छ, जसले फिल्मलाई विशेष बनाउँछ । अन्य कलाकारहरूमा वर्षा राउत, पूजा चन्द, ऋचा घिमिरे, बुद्धि तामाङ, सुचित्रा उप्रेती लगायत विदेशी कलाकारहरूको पनि अभिनय रहेको छ ।
वेलडन क्रियसनको व्यानरमा निर्माण भएको यो फिल्ममा ऋचा घिमिरेको प्रस्तुति छ भने अनिल पाण्डे र शिवराज कार्कीले लगानी गरेका छन् । फिल्मका कार्यकारी निर्मातामा प्रिन्स युवराज कार्की र श्रुती दाहाल रहेका छन् । छायांकन सुशन प्रजापतिले गरेका छन् भने रामजी लामिछाने र शिशिर खातीले कोरियोग्राफीको जिम्मेवारी निभाएका छन् । संगीत आशिष अविरल, कल्याण सिंह र कृष्ण भारद्धाजले दिएका छन् भने अजय खड्काले सम्पादन गरेका छन् ।
Discussion about this post