मिसेस पुर्बेली आईकनकी प्रतिष्पर्धी जिकिसाको धेरै धन कमाउने सपना

इटहरी/ विवाहित महिलाहरुका लागी ओपन स्पेस प्रालीको आयोजनामा कोशी प्रदेश स्तरिय पहिलो ‘मिसेस पुर्बेली आईकन-२०२४’ भैरहेको छ । यो प्रतियोगिता केवल सौन्दर्य प्रदर्शनमा सिमित नभई विवाहित महिलाहरुको सीप वृद्धि, बौद्धिक र व्यक्तित्व विकाससहित आत्मविश्वास र महिला सशक्तीकरणमा योगदान पुर्‍याउने लक्ष्य राखेको छ । प्रतियोगितामा ८ जना महिलाहरुको सहभागिता रहेको छ, जसमा जिकिसा सापकोटा पनि एक प्रतिष्पर्धी हुन् ।

धरहरा, बेलवारी-७ मा जन्मिएकी सापकोटा सामान्य पारिवारिक वातावरणमा हुर्किएकी हुन् । उनका बुबा महेन्द्र प्रसाद सापकोटा र आमा कमला सापकोटा हुन् । उनले एमबीएस सम्मको अध्ययन पूरा गरेकी छन् । बाल्यकालमा चन्चले स्वभावकी र धेरै बोल्ने बानी भएकी जिकिसाले ठूला र साना सबैलाई आदर र माया गर्ने चरित्र देखाइन् ।

किशोरावस्थामा उनले धेरै धन कमाउने सपना देखेकी थिइन्, जुन सपना अहिले पुरा हुँदै गरेको उनले बताइन् । शिक्षण पेशामा काम गरिसकेकी उनले हाल यो पेशामा निरन्तरता भने दिन सकेकी छैनन् । परिवारको सल्लाह र समर्थनमा काम गर्न रुचाउने सापकोटाले आफ्नो निर्णय सधैं परिवारको राय अनुसार गरेको उल्लेख गरिन् ।

उनले २०८० साल माघ २३ गते सागर गौतमसँग मागी विवाह गरेकी हुन् । श्रीमान् र परिवारका अन्य सदस्यहरूको पूर्ण समर्थन पाएकी सापकोटाले विवाहपछि सौन्दर्य प्रतियोगितामा पहिलो पटक सहभागी भएकी हुन् । उनले यस कार्यक्रमले सामाजिक समस्याहरूबारे गहिरो समझ र सकारात्मक सोचको विकास गराएको महसुस गरेकी छिन् । साथै, परिवार, साथीहरू र माइतीबाट पनि सकारात्मक प्रतिक्रिया प्राप्त गरिरहेको बताउछिन् ।

यो प्रतियोगिता जित्नसके पनि वा नजितेपनि उनले आफ्नो सिकाइलाई जीवनभर उपयोग गर्ने र साथीहरूसँग सदैव मिलनसार सम्बन्ध कायम राख्ने बताइन् । तर, यदि प्रतियोगिता जित्न सफल भइन् भने, उनले विवाहित महिलाहरूलाई पनि आफ्नो मेहनत र सोचले सफलता प्राप्त गर्न सकिन्छ भन्ने प्रेरणा प्रदान गर्ने सोच राखेकी छिन् ।